تازه سرليکونه
د (نبوي سیرت) نورې ليکنې
تازه سرليکونه
بېلابېلې ليکنې
نبوي سیرت: د وحیو د راتلو شپږ ډولونه (۵۸)
  تعلیم الاسلام ویب پاڼه
  July 29, 2019
  0

نبوي سیرت (۵۸ برخه)

لیکنه: مولوي عنایت الله علمي / تعلیم الاسلام ویب پاڼه


د وحیو د راتلو شپږ ډولونه
د مخه تردې چي د رسول الله ﷺ  د رسالت او نبوت د ژوند په تفصيلاتو شروع وکړم دا ښه او لازمه بولم چي د وحيو اقسام او اشکال در وښوول سي ځکه وحيِ د رسالت اساس او د دعوت ريښه او اصل بلل کیږي، نو وحيِ يا نزول د وحيو پر شپږ قسمه دى، يعني: و رسول الله ﷺ  ته وحيِ پر شپږ قسمه نازلي سوي دي.


اول: د خوب ليدل دي، علماءکرام وايي چي د أنبياؤ علیهم السلام خوب وحيِ دي، ځکه ابراهيم علیه السلام  و خپل زوى ته و ويل: 


(يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ) [الصافات:  ۱۰۲ ]  
يعني: اې زما زويه زه پرله پسې په خوب کي وينم چي تا حلالوم. 

نو دغه خوب وحيِ وې.


دوهم: دا چه جبريل علیه السلام  به د رسول الله ﷺ  په زړه کي هغه د مقصد شئ ور واچاوه، بېله دې څخه چي رسول الله ﷺ  مَلَکه و ويني، لکه څرنګه چي رسول الله ﷺ  فرمايي:


( إنّ رُوحَ الْقُدُس نَفَثَ فِى رَوعِى: أنّهُ لَن تَمُوتَ نَفسٌ حتّْی تَستَکمِلَ رِزقَهَا وأَجَلَهَا، فَاتَقُوا اللهَ، وَ أجمِلُوا فِى الطَلَبِ، وَلاَ يَحمِلَنـّکُم اِستِبطَاءُ الرِزقِ عَلى اَن تَطلُبُوهُ بِمُعصِيَةِ اللهِ، فَاِنّ مَا عِندَ اللهِ لا يَنَالُ اِلاّ بِطَاعَتِهِ)
يعني: روحُ القدس چي جبريل علیه السلام  دى زما په زړه کي را واچول، چي اصلاً موږ و دغه ته الهام وايو، رسول الله ﷺ  فرمايي: الهام را ته وسو  چي هيڅ نفس يا هيڅ ژوندئ مخلوق تر هغو پوري نه مري چي رزق او اجل يې پوره نه سي، نو د اللهﷻ څخه وبيريږى او د رزق په طلبولو کي سمه لار اختيار کړى او د رزق طلب بايد تاسي و دې ته مجبوره نه کړي چي د اللهﷻ په معصيت او ګناه يې طلب کړی، ځکه هر هغه څه چي د اللهﷻ سره دي بېله اطاعته د الله په بل شي سره نه حاصليږي. 


خو د دې حديث په بيانولو سره زموږ مقصد الهام ؤ چي دا هم د وحيو يو قسم دى.


د وحيو درېيم قسم دا دى: چي رسول الله  ﷺ  ته به جبريل علیه السلام  د يوه سړي په شکل سره راغلى او په دغه قِسم وحيو کي به اصحابِ کرامو هم دغه سړئ ليدى او دا د دوو نفرو د تفاهم او پوهېدلو د پاره د وحيو هغه آسان ترين شکل دى، ځکه دلته د دواړو طرفو په منځ کي تجانُس او يو شئ والى موجود وي او ډير ځله جبريل علیه السلام  و رسول الله ﷺ  ته د دِحيَةُ الکَلبي رضی الله عنه په شکل راغلى دى.


 د وحيو څلورم قسم داسي ؤ: چي د زنګ يا زنګولې د شرنګهاري په شکل سره به یو آواز ؤ، چي د وحيو په اقسامو کي دغه قسم وحیِ د رسول الله ﷺ  د پاره هغه تر ټولو سخت او مشکل قسم د وحيو ؤ، حتّْی په ډير شديد يخ کي به پر رسول الله ﷺ  خولې را بهېدلې او که به پرکوم حيوان سپور ؤ د هغه حیوان ځنګنونه به پر مځکه کت سوه، يو وخت و رسول الله ﷺ  ته دغه قسم وحيِ نازلېدې او د رسول ﷺ  مبارک ځنګون د زيد بن ثابت رضی الله عنه پر ځنګانه پروت ؤ، زيد رضی الله عنه وايي: قريبه وه چي د رسول الله ﷺ د ځنګانه د دروند والي په سبب مي ځنګون په مځکه ننوزي.

 
د وحيو پنځم قسم دا دى: چي رسول الله ﷺ  به مَلَکَه په هغه خپل واقعي شکل کوم چي اللهﷻ پر هغه شکل خلق کړې او پیدا کړې ده وليدل او دا قسم وحيِ و  رسول الله ﷺ  ته د ټول رسالت په موده کي دوه واره پيښي سوي دي، لکه اللهﷻ  چي په سورة النجم کي ذکر کړي دي.  


د وحيو شپږم قسم هغه دى: کوم چي اللهﷻ د معراج په شپه لوړ تر آسمانو پر رسول الله ﷺ  لمونځونه فرض کړل، بيله واسطې بيله مَلَکي د پردې تر شا خطاب ؤ او لکه د موسْى علیه السلام  سره چي په جبل طور کي څو واره داسي وسوه، چي د اللهﷻ خبري به يې اورېدلې او هغه عزوجل به یې نه لیدی او دا د وحيو هغه کاملترين شکل او صورت دى. 


ان شاءالله نور بیا....


ماخذ: د سرورِ کائنات صلی الله علیه وسلم ژوند

 

سرته