تازه سرليکونه
د (خاتم النبيين ﷺ) نورې ليکنې
تازه سرليکونه
بېلابېلې ليکنې
نبي علیه الصلاة والسلام او ماشومان
  تعلیم الاسلام
  October 20, 2015
  0

ليکنه: مولوي محمد نادر حنفي 

سرچینه: تعلیم الاسلام ویب پاڼه

 رسول الله  صلی الله عليه وسلم  فرمايي : مَا مِنْ مَوْلُودٍ إِلاَّ يُولَدُ عَلَى الْفِطْرَةِ فَأَبَوَاهُ يُهَوِّدَانِهِ وَيُنَصِّرَانِهِ وَيُمَجِّسَانِهِ كَمَا تُنْتَجُ الْبَهِيمَةُ بَهِيمَةً جَمْعَاءَ هَلْ تُحِسُّونَ فِيهَا مِنْ جَدْعَاءَ ».

ژباړه : هر زېږېدونکى ماشوم پر اسلامي فطرت زېږي خو وروسته يې بيا مور اوپلار ( د محيطي تاثير په وجه ) يهودي ، نصراني او مجوسي  ورڅخه  جوړوي  ر سول الله  صلی الله عليه وسلم  محيط د دې تا ثير لپاره يو مثال وړاندي کوي ، لکه څه ډول چي يو حيوان روغ رمټ له خپلي موره زېږي نو د هغه نه پزه اونه هم غوږ پرې وي ، خو د زېږېدني وروسته يې غوږ يا پزه خلک ور پرېکوي .
 
       مسلمان ماشوم ، چي د يهودي په کور کي رالوى سي يو سرسخته يهودي ځني جوړېږي او د نصراني په کور کي بيا د عيسويت  ددين پر عقيده را پورته کېږي  او د مجوسي د کور څخه بيا همداسي  را  واخله  چي د اور عبادت کونکى ورڅخه جوړ سي ،دا ځکه چي هلته هم دا ډول دعوت روان دئ او دغه ماشوم د همدغه  دعوت په نتيجه کي هغه لاره  خپلوي کوم  چي د دوئ مشران ورباندي روان وي ، ماشوم په خپل چاپير يال کي چي څه ويني او  اوري بس هغه ته په خپل ذهن او دماغ کي ځاى ورکوي او د هغه سره مينه او محبت پيدا کوي . 
 
          مسلمانه  وروره ! موږ  او تا سي بايد خپل اولادونو ته ځير سو تر څو د هغو په ذهنونو کي وهغه څه ته ځاى ورکړل سي چي موږ او تاسو ته په نبوي احاديثوکي بيان سوي  دي . نبي عليه السلام فرمايي :  ستاسي  اولادونه  چي کله (٧) کلن سي پر لمانځه يې امر کوى او کله چي (١٠) کلن سي او لمونځ يې نه کاوه نو و يې و هئ . ( رواه ابوداود ) 
 
      د دي وينا څخه معلومه سوه چي کله زموږ او لادونه (٧) کلن وي بايد چي د دوئ لمونځ  زده وي ، مخکي لا ورسره د لمانځه په هکله کوښښ سوئ وي او  دلمانځه طريقه ، فرايض ، واجبات او مفسدات مو ورته ښوولي  وي ، دا په دا سي حال کي ،  چي موږ د خپلو او لادوسره   ډېره بېغوري کوو و لوبوته مو خوشي کړي وي ، د دوئ  د ساتيري لپاره ډول ، ډول شيان ورته رانيسو ، د کالو ، د خوړو او د نا جوړۍ په باره کي يې ډېر متوجه يو  مګر  د لمانځه  او عقيدې  هيڅ  خيال يې زموږ سره نه وي . 
 
عبدالله بن عمرو بن العاص  رضي الله عنه  وايي : پر ما باندي دوې جامي  چي په ژړ رنګ رنګ سوي وې نبي عليه السلام وليدې او راته وې ويل : (امک امرتک بهذا )  يعني ايا  مور په دې رنګ  جامو دا امر در ته کړى  چي تا اغوستي دي ،  ما ورته وويل  : چي پرې يې  منځم ،  هغه  مبارک راته و فرمايل (بل احرقها ) يعني وه يې سوځوه . 
او بيا يې راته  و فرمايل :  إِنَّ هَذِهِ مِنْ ثِيَابِ الْكُفَّارِ فَلاَ تَلْبَسْهَا ».
ژباړه : دغه جامې د کافرانو دي مه يې اغونده . ( رواه مسلم ) 
 
        په دې  حديث  شريف کي  و موږ ته يو لوى سبق را کړل سوئ دئ ، چي د خپلو اولادونو و لباس ته مو هم بايد فکر وي په خاص ډول  و زنانه اولادو ته ، چي هغوئ له تلويزون څخه رنګا رنګ کفري موډونه او لباسونه زده کوي او بيا وروسته  و خپلو انجونو ته هغه ډول کالي او جامې ور اغوندي . دغه زنانه خو  پو هيږي ، چي موږ خو مسلمانان  يو  نو  موږ بايد هغه ډول موډونه استعمال نه کړو کم چي غير مسلماناني ښځي يې استعمالوي . 
 
       عمر بن ابى سلمة  رضي الله عنه  وايي :  زه يو کوچنى هلک وم ، د نبي عليه السلام په کور کي او سېدم ( نوموړى د نبي عليه السلام بچندر وو ) دى وايي : چي کله به پر ستر خان د ډوډۍ خوړلو لپاره کښېنستم او خواړه به مي خوړل  نو زما لاس به په کاسه کي د يو شي د را اخستلو له پاره يوې او بلي خواته غځېدئ ،کله  چي  به په دې حالت کي د نبي عليه السلام را ته فکر سو نو به يې راته وويل : ( ياغلام سم الله و کل بيمنيک و کل مما يليک)
 
 ژباړه : اې کوچنيه ! بسم الله  ووايه ، په راسته لاس او د خپل مخ څخه يې خوره ، دى وايي چي همېشه بيا زما دغه رنګه خوراک وو ( رواه بخاري ) 
 
 
په دې حديث شريف کي بيا  والدينوته د خپلو اولادونو په هکله ډېر لوى سبق ورکړل سو ، چي د خپلو اولادو د آدب او دښو اخلاقو د پيداکېدو ډېري هڅي به کوي  ، چي هغوئ په نبوي اخلاقو سمبال سي تر څو په اسلامي طريقه باندي خوړل او چيښل وکړي ، نه يوازي دا چي د خپلو اولادو په فکر کي به ياست ، بلکي ستاسو په کور   کي  چي ستاسو د دوستانو څخه هر ماشوم  ژوند کوي ، د هغو د ادب  او تربيې ډېر فکر به کوئ ، دا ځکه چي په تېر حديث شريف کي عمر بن ابى سلمة رضي الله عنه  د نبيعليه السلام زوئ نه وو بلکي د خپلي ښځي يې وو ، چي د هغې دبل خاوند څخه  سوئ وو( بچندر يې وو ) مګر نبي عليه السلام و غوښتل ، چي هغه ته د ډوډۍ خوړو ادب ور  زده کي  نو وهر مسلمان ورور او خور ته په کار ده چي بايد و خپلو اولادوته اسلامي تر بيه ور کړي .
 
ماخذ: تعليم الاسلام مجله، ۷ ګڼه

سرته