څانګه: حقوق نيټه: November 22, 2012
       
د ښځي او مېړه حقونه
رالېږونکی: د تعلیم الاسلام همکاران

د انسانانو په خپل مېنځي اړيکو کي د ښځي او مېړه اړيکي هم ډيري مهمي دي او دا دواړه ګواکي د نوک او ورۍ په څېر دي له دې کبله اسلام د هغوي په اړوند هم ډيري ښکاره، روښانه او تاکيدي لارښووني کړي دي، په دې اړه د اسلام د ښونو لنډيز دا دئ چي مېرمن ته ښايي چي د خپل مېړه پوره غوښتنه او خبره ومني او د هغه په امانت کي هيڅ ډول خيانت ونه کړي، الله تعالى په سورت النساء کي فرمايي: ...فَالصَّالِحَاتُ قَانِتَاتٌ حَافِظَاتٌ لِلْغَيْبِ...(سورت النساء، ایت ٣٤)
 
ژباړه: نو نېکي ښځي منونکي وي، د مېړه په غياب کي د هغه د مال او عزت ساتونکي وي. 

 او خاوندانو ته د اسلام حکم دا دئ چي هغوي دي د مېرمنو سره پوره مينه وکړي، د خپل توان او وس سره سم دي ښه خواړه ورکړي، ښه لباس او جامي دي ورته ورکړي او د هغوي د زړه په ساتلو کي دي کمي نه کوي. الله تعالى د سورت النساء په ١٩ ايت کي فرمايي: وَعَاشِرُوهُنَّ بِالْمَعْرُوفِ...
 
ژباړه: او د خپلو مېرمنو سره ښه چال چلن کوئ.

 رسول الله صلى عليه وسلم به د دې قراني لار ښوونو سره سم مسمانانو سړو او ښځو ته د  يو بل سره د نېک او ښه چال چلن او د يو او بل د خوشحاله ساتلو په هکله ډېر سخت ټينګار کاوه په دې لړ کي څو مبارک احاديث دا دي: رسول الله صلی الله علیه وسلم لعنت ويلي دي په درو ډلو: يوه هغه ښځه چي شپه پر تېره سي او خاوند ور څخه ناخوښه وي.(سنن الترمذي-٢،٩٧) 
 

بل ځاى رسول الله صلى عليه وسلم وفرمايل دوې ډلي داسي دي چي لمونځونه يې د سره څخه نه پورته کيږي هغه غلام چي د خپل بادار څخه تښتېدلى وي او بل هغه مېرمن چي د خاوند نافرماني کوي تر څو چي د دې عمل څخه ونه ګرځي.(المستدرک على الصحيحين للحاکم-١٧،١٧٦)
 

او د دې بر عکس په يو بل حديث شريف کي رسول الله صلى عليه وسلم فرمايلي دي: که کومه مېرمن په داسي حال کي مړه سي چي خاوند يې ورڅخه خوښ او راضي وي نو هغه به جنت ته دا خله سي. (سنن الترمذي- ٤،٣٨٨)
 
په يو بل حديث کي راغلي دي چي رسول الله صلى الله عليه وسلم وفرمايل: قسم په هغه ذات چي د محمد صلى الله عليه وسلم روح د هغه په لاس کي دئ! هيڅ ښځه د الله پاک حق تر هغه وخته پوري نه سي ادا کولاى تر څو پوري چي د خپل مېړه حق ادا نه کړي (سنن ابن ماجه-٥،٤٤٩)

او په يوه ډيره مهمه موقع د مسلمانانو ډيري ستري ټولني ته په ځانګړي ډول نارينه ؤ ته نبي کريم صلي الله عليه وسلم وفرمايل: زه تاسو ته د ښځو سره د ښه سلوک او چلن په ځانګړي ډول وصيت کوم: تاسي هغوي د الله پاک په امان سره خپلي کړي دي، او د هغوي فرجونه مو د الله پاک په کليمه باندي ځانته حلال ګرولي دي. (صحيح مسلم -٢٤٥،٦)

په يوبل ځاى کي رسول الله صلي عليه وسلم وفرمايل: په تاسو کي غوره هغه څوک دئ چي د خپلي مېرمني په حق کي ښه وي او زه په تاسو کي د خپل اهل له پاره ښه يم او چي کله مو د ژوند ملګرى وفات سي نو دعا ورته کوئ. (ترمذي)
په يوبل روايت کي راغلي دي چي رسول الله صلى الله عليه وسلم وفرمايل: په مسلمانانو کي د زيات کامل ايمان خاوند هغه دئ چي اخلاق يې ښه وي او د خپلي کورنۍ سره د هغه چلن په نرمۍ او ميني سره وي. (المعجم الکبير للطبراني-٣٤١،١٩)

ماخذ: اسلام څه شی دی؟