څانګه: شعرونه نيټه: April 5, 2012
       
علم او فضل

 علم و فضل چي هیڅ نه وي د پسر

څو به وياړي په کمال د خپل پدر

خصلتونه چي د پلار ور څخه نه وه
ګوره څه سو هغه زوی د پيغمبر

د قارون خسف به ولي وای په مځکه
که موجود وای د کليم پکښي اثر

يو د بل په نامه کله څوک تيريـږي
هرسړى وي ښايسته پخپل هنر

په طاعت که د نيکانو بدان خلاص وای
د نفسي آواز به نه وای په محشر

په ظاهر که زوى د ستار د پلار په سرکه
چي معنا يې نه وي خاوري یې په سر

که احوال د بې تميزو تمام وکښم
له تحريره به مي ساز سي يو دفتر

هم په دا چي تل د حق ترخه ويل کا
پير محمد سو و جاهلو ته ابتر