څانګه: شعرونه نيټه: March 5, 2013
       
کربلا ده تودې شګې دي غرمه ده

 رالېږونکی: نوید احمد

 

 
 
کربلا ده تودې شګې دي غرمه ده
تودې تندي ور اخیستی غرغړه ده

د ایمان د نور رڼا ډېوه ډېوه ده
پتنګان لمبه لمبه دي تماشه ده

نه په تاو نه په تاوان نه په غرمه ده
د الفت څومره معصومه عقیده ده

وارخطاء د یزیدانو رویه ده
شهادت د حسنینو وظیفه ده

د یزید د پاچاهۍ نیمګړې خیاله!
د حسین د سر سودا ډېره ترخه ده

له دردونو له دارونو بې پرواه ده
د الفت د پتنګانو څه نشه ده!

د یزید د خیل او خیاله مخالف دی
د صابر او د حسین لاره یوه ده

کربلا ده تودې شګې دي غرمه ده
تودې تندي ور اخیستي غرغړه ده