تازه سرليکونه
د (فتوا حلال او حرام) نورې ليکنې
تازه سرليکونه
بېلابېلې ليکنې
فتوا: په خارج کي د ښځو بازار ته وتل
 
  April 13, 2013
  0

 تعليم الاسلام  دارالافتا‌ء


مسلسله شمېره : (٤٢١)

نوم: محب الله

د اوسېدو ځای:  امريکا

سوال :  په خارج کي هره ښځه  دخپل خاوند سره بازار يا پارکو ته ځي ، همدا ډول زما خاوند هم غواړي چي زه ورسره بازار ته ولاړه سم خو زه نه غواړم چي ورسره ولاړه سم ، چي ګناه لري ، نو دى ماته په جواب کي وايي چي ته په ګناه کاره کيږي که زما په خوله ونه کړئ ؟ (يعني بازار ته په تګ ګناه کاره کېږي او که٨ زما په نافرماني ګناه کاره کېږي ؟ 

جواب : 

حامداً  و مصليًا

دا ډېر لوي عزت دي چي الله جل جلاله و ښځو ته ورکړى دى چي ښځه دي بېله خپل خاوند څخه بل څوک نه ويني،  دا عزت بايد دا د لاسه ورنه کړي، د خاوند حکم تر هغه وخته لازم دى چي په هغه کي د الله جل جلاله د حکم ماتوالي نه وي،  د الله جل جلاله حکم دا دى چي ښځه دي په خپل کور کى قرار ونيسي (٢) دباندي دي نه را وځي.  د ستر په باره کي (٧) اياتونه نازل سويدي (١) 

يو مسلمان به څنګه د بنده د رضا په خاطر الله جل جلاله ناراضه کوي؟

د نبي کریم صلی الله علیه وسلم په زمانه کي ښځي د مسجد ولمانځه ته تللې په داسي لوی څادر کي چي سر تر نوکه به پټي وې، کله چي نبي کریم عليه الصلاة السلام د دنيا څخه ولاړی نو اصحاب کرامو رضي الله عنهم په اتفاق سره دا حکم وکړی چي  اوس وخت د فتنو دى ښځي دي و مساجدو ته نه راوزي، نو چي د مسجد د لمانځه څخه د فتنې په ګمان بندي سوي دي،  اوس چي فتنه يقيني ده نو د خاوند حکم به و بازار ته د وتلو څنګه لازم وي او مخالفت به يي څنګه  ګناه وي؟

او د ضرورت په وخت کي د وتلو اجازه سته خو په چادري کي به پټه وي . (٣)

درې امامان لکه امام   مالک، شافعي او احمد رحمة الله عليهم  وايي چي د ښځي مخ او ورغوي لڅول مطلقًا ناروا دى، که د فتنې بيره وي او که نه وي او امام ابوحنيفه رحمة الله علیه وايي که د فتنې بېره وه نه به يې لڅوي او فتنه خو اوس يقيني ده، نو په اتفاق د امامانو مخ او ورغوي پټول ضروري دي (بېله د لمانځه د حالت څخه). 

جواب : مولوي عبدالهادي آغا 
الجواب صحیح : مولوي سيد عبدالباري و مولوي عبدالغفار حسنيِ
تعليم الاسلام  دارالافتا‌ء
افغانستان کندهار 
ـــــــــــــــــــــــــــــــــــــــــــــــــــــــــــــــــــــــــــــــــــ
(۱) : درې ایاتونه په سوره نور  کي دي او څلور اياتونه  په سورة  احزاب کي دي.
(٢) :  وَقَرْنَ فِي بُيُوتِكُنَّ. سورة الاحزاب: ايت (٣٣)  .
(٣): يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ. سورت احزاب: ايت ٥٩ 

سرته