څانګه: نکاح نيټه: April 4, 2014
       
د طلاق او وفات ګډه عده
څوک چي د مرګي په ناروغي کي خپلي ښځي ته طلاق ورکړي او بیا په همدې ناروغۍ کي مړ سي که ښځه یې حامله وه نو په لنګون یې عده ختمیږي ځکه د حاملې ښځي د طلاق او وفات عده یو شان ده په لنګون وپای ته رسیږي .

که ښځه حامله نه وه او مېړه یې د مرګي په ناروغي کي رجعي طلاق ورکړي او بیا په همدې ناروغۍ کي وفات سو ، دا ښځه به د وفات او د طلاق په عده کي هغه عده تېروي چي هغه تر هغي بلي اوږده وي .

د بېلګي په ډول که ښځي ته د ماشومتوب یا د ډېر عمر لکبله میاشتنۍ ناروغي نه پیښېدله ، د دغي ښځي د طلاق عده درې میاشتي ده ، دا ښځه به د وفات عده تېروي ځکه د وفات عده يې څلور میاشتي او لس ورځي ده او دا د طلاق د عدې څخه زیاته ده .

که د ښځي عده په حیضونو وه خو داسي وه چي په دوو میاشتو کي یو ځلي حیض ورته پيښېده ، دا ښځه بیا د طلاق عده تېروي ، ځکه د دغي ښځي درې میاشتنۍ ناروغي تر څلورو میاشتو او لسو ورځو څخه ډیر وخت په بر کی نیسي .

که څوک د مرګي په ناروغۍ کي ښځي ته بائن طلاق ورکړي او بیا په همدې مریضي کي وفات سي د ابوحنیفة رحمة الله علیه په آند دا ښځه به د طلاق او د وفات په عده کي هغه عده تېروي چي هغه تر هغي بلي اوږده وي .

خو د ابویوسف رحمة الله علیه په آند دا ښځه به د طلاق عده تېروي ، يعني د درو حیضونو په تېرېدلو سره یې عده ختمیږي .

ښځي ته چي د حیض په مده کي طلاق ورکول سي همدا حیض یې په عده کي نه شمېرل کیږي ، بلکي تردې حیض وروسته چي درې حیضونه پر تېر سي هلته یې عده پای ته رسیږي .

ماخذ: فقه المبتدي، دوهم ټوک- نکاح
مؤلف: مولوي محمد عمر خطابي