تازه سرليکونه
د وکیل وکیل
 
  January 29, 2015
  0
 په عام وکالت کي وكَيْل بل وكَيْل درولاى سي ځکه چي عام وکالت هغه ته وايي چي مُوَكِّل کار د وكَيْل رايي او نظر ته وسپاري نو وكَيْل چي څه ډول لازم وګڼي همغسي کولاى سي ، که يې پخپله کاوه او که يې وكَيْل ورته ټاکه په هغه يې کاوه ځکه ده لره اختيار ورکول سوى دى .

په خاص وکالت کي د خرڅولو وكَيْل بل وكَيْل د مُوَكِّل بې اجازې نسي درولاى چي په هغه يې خرڅ کړي ، ځکه چي د شيانو خرڅول ځان ته مهارت ، تجربه او اعتماد غواړي ، داسي هم نه ده چي مُوَكِّل ته به د وكَيْل وكَيْل هم د ده په شان د تجربې څښتن او اعتماد وړ کس وي ، ځکه ډېر خلک داسي دي چي يوه ته به ډېر د اعتماد وړ وي خو بل کس به بيا پر هغه د لږ شي باور لا هم نسي کولاى .

خو که وكَيْل ته د داسي شي د خرڅولو وکالت ورکړل سي چي د هغه خرڅول پخپله د وكَيْل د شان وړ او مناسب کار نه وي هلته بيا خاص وكَيْل د هغه د خرڅولو د پاره بل کس وكَيْل ټاکلاى سي. 

 مثلا : يو مخور سړي ته څوک د پسه يا غوايي د خرڅولو وکالت ورکړي دلته وكَيْل بل کس وكَيْل درولاى سي ، ځکه په ګنج کي د مخور سړي د پاره پخپله د پسه او غوايي خرڅول نا مناسب کار ښکاري .
دغه ډول که مُوَكَّل فِيهِ داسي شى وي چي وكَيْل يې په يوازي سر خرڅولاى نسي بلکي په خرڅولو کي يې د بل کومک ته اړتيا ولري او يا داسي شى وي چي خرڅول يې خاص مهارت ته اړتيا ولري او وكَيْل د هغه ډول مهارت څښتن نه وي په داسي حالاتو کي هم خاص وكَيْل بل وكَيْل درولاى سي .
 
ماخذ: فقه المبتدي، دریم ټوک- معاملات
مؤلف: الحاج مولوي محمد عمر خطابي حفظه الله
 
تبصره
يو نوم خامخا وليکئ.دغه نوم تر ٤٠ تورو زيات دى.
برېښناليک خامخا وليکئ.دغه برېښناليک تر ٤٠ تورو زيات دى.دغه برېښناليک باوري نه دى!.
متن خامخا وليکئ.متن تر وروستي بريده رسېدلى دئ.

  که نه لوستل کېږي دلته کليک وکړئ.  

سرته