تازه سرليکونه
د (چاڼ سوي مضامين) نورې ليکنې
تازه سرليکونه
بېلابېلې ليکنې
ایا په روژه کي مو ځان ته پام دی؟
  تعلیم الاسلام
  January 30, 2016
  0

 لیکوال : نثار احمد صمد / تعلیم الاسلام ویب پاڼه

 
 د روژې مقصد یوازی لوږه او تند ه نه ده بلکی ډیر لوی مقصد او هدف لري . پر موږ روژې فرض سوي دي تر څو متقي او پرهیزګاره سو . انسان دوه لوی دښمنان لري چي لومړنی شیطان دی او دوهم د هغه نفس دی . د روژې په مبارکه میاشت کي خو شیطان تړلی دی ، نو اوس یوازي د نفس سره مقابله او مجادله راپاته ده . نفس په درو شیانو سره کمزور او مغلوب کیږي چي هغه دا دي :
 
 لومړی ـ لږ خوړل ؛ دوهم ـ لږ خوب کول ؛ درېیم ـ لږ خبری کول .
 
 که موږ او تاسي ښه وګورو او غور وکړو نو وبه وینو چي د روژې په مبارکه میاشت کي دا درې کارونه په آسانۍ سره کولای سو خو زموږ نفس مو نه پریږدي چي ویې کړو . هغه داسی :
 
موږ پیشلمی دومره دروند کوو چي سبا ټوله ورځ مو د نس کڅوړه ډکه وي او بدبویه ټېغونه باسو . د روژه مات وخت خو نو څه کوې ! بیا نوبت د لږ خوب دی . زموږ نفس مو نه پریږدي چي په ورځ کي تر پنځه شپږ ساعته لږ خوب وکړو ( آن دا چي په روژه کي تر نورو وختو هم ډیر خوب کوو ) ! بیا وار د لږ خبرو دی . اول خو د نورو یوولسو میاشتو په شان هغومره خبري کوو یعني نه یې لږوو ، بیا نو موبایل تلیفون ، انټرنیټ او فېس بوک خو دومره استعمالوو چي تر نورو میاشتو لږ نه بلکي ډیر وي . په تیره بیا د موبایل مسېجونه خو تر پخوا هم ډیر فعال وي او موږ یې ښه مصروف کړي یو .
 
 نو باید د نفس شیطانیو ته متوجه سو یعني د روژې په مبارکه میاشت کي لږ وخورو ، لږ خوب وکړو او لږ موبایل یا فېسبوک وکاروو خو په عوض کي یې وخت د قرآنکریم پر تلاوت ، استغفار ، دعاوو ، اذکارو او د جماعت پر لمانځه باندي تیر کړو . دا به نو اصلي روژه وي . 
 
باید متوجه اوسو چي په دې مبارکه میاشت کي د یوې نیکۍ په بدله کی اویا ثوابونه راعطا کیږي . نو ولی یې وړیا له لاسه ورکړو ؟! د رسول الله صلی الله علیه وسلم د ارشاد مفهوم دی چي هغه شخص هلاک سو چی په خپل ژوند کي د رمضان میاشت ور ورسیږي خو ده ته بخښنه ونسي . نو که موږ او تاسي په دغه مبارکه میاشت کي خپل نفس کنټرول کړو ، ښایي په مابعده یوولسو میاشتو کي یې هم کنټرول کړای سو . الله تعالی دي د همداسي کړنو توفیق راکړي . خو یوه قلبي اراده او فیصله غواړي او اوس هم ناوخته نه دی .
 

سرته