څانګه: اولياء کرام رحمهم الله نيټه: August 31, 2015
       
د شیخ عبدالقادر جیلاني (رح) څو ویناوي

د حضرت شیخ عبدالقادر جیلاني (رحمة الله علیه) څو ویناوي

رالیږونکی: مؤمن شېرذاد

۱: اې غلامه ! تالره ښايي چي تقوا وكړې. د نفس ،هوا، شيطان او د بدو ملګرو څخه ډډه  وكړې.

۲: اې قومه ! د لوى څښتن عزوجل د نعمتونو شكر ادا كړئ او دا نعمتونه دده څخه وبولئ.

۳: اې غلامه ! همېشه په دې فكر كي مه اوسه چي څه به خورم ، څه به چيښم، څه به اغوندم ،څوك به په نكاح كړم، چيري به سكونت كوم، او څه به جمع كوم. دا ټوله د نفس غوښتني دي د زړه او سر غوښتنه د لوى څښتن جل جلاله طلب دى.

۴: اې قومه ! د نيكو كارونو كړنه غنيمت و بولئ ، د ژوند دروازه غنيمت و بولئ چي ستاسي پر مخ خلاصه ده د لوى څښتن جل جلاله د نيكو بندګانو دروازه غنيمت و بولئ او ورداخل سئ تاسي نه پوهيږئ چي تر څو به خلاصه وي ،ددعاوو دروازه غنيمت و بولئ چي ستاسي پر مخ خلاصه ده.

۵: اې غلامه! دبدانو سره مجلس تا پر نيكانو باندي بد ګمانه كوي.

۶: همېشه د لوى څښتن جل جلاله د كتاب او د رسول الله صلى الله عليه وسلم د سنت تر سيوري لاندي حركت كوه ، تر څو خلاصون دي په برخه سي.

۷: اې غلامه ! د لوى څښتن جل جلاله د سپيڅلو بندګانو سره ملګري كوه او د ناپوهانو له ملګرى څخه ځان ساته.

۸: اې قومه ! تر څو چي مو توان وي د دنيا له غمونو څخه ځان و ژغورئ.

۹: لومړى د شرك څخه پرهيز وكړى، دوهم د ګناهونو څخه توبه وباسى بيا د قرآن او سنت احكام ټينګ كړئ او هيڅكله يې له لاسه مه وركوئ.

۱۰: الله جل جلاله سپېڅلى او لوى دى او د بنده په زړه كي دوې بيري نه ځايږي كله چي د لوى څښتن جل جلاله بيره په زړه كي ځاى ونيسي د دنيا او د هغه په اړه نوري بيري له منځه ځي.

۱۱: د ريا كارو او منافقو ښه عملونه د منلو وړ نه دي ،هغه ښه عملونه د حق تعالى په حضور كي ارزښت لري چي يوازي دده د رضا لپاره وي.

۱۲: راسه د خپل مهربان ورور نصيحت ومنه مخالفت مه ورسره كوه ځكه چي زه ستا د ګټي او تاوان په باره كي داسي شيان وينم چي ته يې نه وينې ،صادق او رښتنى مومن به و خپل مومن ورور ته به په نصيحت كي داسي شيان څرګندوي چي هغه ورڅخه خبر نه وي.

۱۳: اې مريدانو او دوستانو ! ستاسو لپاره نصحيت كونكى يم د هغه په عوض كي هيڅ اجر نه در څخه غواړم زه د دنيا غوښتونكى نه يم او زما په نظر اخرت هم ارزښت نه لري ځكه چي زه د الله جل جلاله د ديدار غوښتونكى يم.

۱۴: د خلګو لپاره د يوه مهربان پلار غوندي وه اوسه.

۱۵: دغفلت د خوب څخه ويښ سه او تل د الله جل جلاله ذكر كوه.

۱۶: مه ظالم جوړيږي او مه مظلوم،  كه دي چاره نه وه نو مظلوم سه او د ظلم څخه په كلكه ځان وژغوره.

۱۷: اې غلامه كله چي خبري كوې په نيك نيت يې وكړه او كه چپ پاته يې هم په  نيك نيت ساكت (چپ) اوسه ، كه څوك نيت تر عمل مخكي نه كوي ده لره عمل نسته.

 

 
د همدې برخي نور توکي

د تمدنونو د ړنګېدو یوه وسیله