تازه سرليکونه
د (نيکمرغه مېرمن) نورې ليکنې
تازه سرليکونه
بېلابېلې ليکنې
له ښځو سره د لاس روغبړ
  تعلیم الاسلام
  December 25, 2017
  0

راټولونه : غلام عمرعبدالله / تعلیم الاسلام ویب پاڼه

 

مصافحه : 

د روغبړ په وخت کي یو او بل ته لاس په لاس کي ورکولو ته وايي ، د نورو مسئلو په څېر دا مسئله هم يوه له هغه مسئلو څخه ده چي د ځينو ټولنو خلک پکي د الله تعالی له اوامرو څخه سرغړونه کوي ، له خپل اسلامي شريعت څخه تېری کوي او د نورو پر باطلو او غلطو لارو يې د نقل په صورت کي حرکت کړی وي ، دغو باطلو او بې ځايه عقيدو او لارو د دوی په ذهنو دومره اثر کړی ، که چېري ته يو (شرعي) دليل ورته وړاندي کړې او له دې حرام کار څخه يې منع کړې نو پر تا به د افراطي ، سخت دريځه ، مزاحمت کوونکي ، بې فرهنګه او بې رحمه تور پوري کړي.

 

دا چي د معاصرو ډيمکراتيکو طاغوتي نظامونو يو هدف د بې حيايۍ او بې پردګۍ عامول دي او د غربي ډیمکراسۍ له اصولو څخه يې عمده اصل دا دی ؛ چي د ژوند په ټولو برخو ( ټولنیزو ، کاري ساحو ، زده کړه يزو او تحصلي ‌مرکزونو ، صنعت ، تجارت او سياست په برخو) کي بايد د ښځو او نارينو ترمنځ اختلاط ( ګډوالی) رامنځ ته شي ، او کوم کس چي له دې ډيمکراتيکو بد اخلاقيو سره په مخالفت کي ودرېږي هغه ته جاهل ، بې فرهنګه او د معاصر ژوند له غوښتنو څخه د بې خبره شخص خطاب کېږي.

 

د المان د شپيګل ورځ پاڼي د دې لپاره ښه سند کېدلای شي ، ورځپاڼه ليکي : د سويډن د زرغون ګوند يو مسلمان غړی يوسرا خان څخه له دې امله د ګوند غړيتوب واخیستل شو چي نومووړي په يوه ټلويزیوني مرکه کي یوې خبريالي ته د روغبړ لپاره لاس ور نه کړ او د روغبړ لپاره يې خپل لاس پرځيګر ونيوی.


زموږ اوستاسو په ټولنه کي د ماما ، کاکا ، خاله ، عمه لوڼو ته ، اخښي خوښيني ته ، ښوونکي زده کوونکي ته ، استاد محصلي ته او سياسيون غير محرمو ښځو ته د روغبړ لپاره لاس ورکول عادي کار ګڼي او حتی ځيني جاهلان دا يو ښه کار او اخلاقي عمل ګڼي ، خو که چېري دې ته د بصيرت او اسلامي شريعت له نظره وګوري نو هيڅ کله به داسي کار ونه کړي.

 

رسول الله صلی الله عليه وسلم په دې اړه فرمايي: ((لأن يطعن في رأس أحدكم بمخيط من حديد خير له من أن يمس امرأة لا تحل له)).طبراني ۲۱۲/۲۰ ، صحيح الجامع ۴۹۲۱.

 

ژباړه : له تاسو څخه چي د چا سر د اوسپني په جبل ووهل شي ، دا ورته ښه دي له دې څخه چي هغه کومه داسي ښځه مسحه کړي چي د هغه لپاره حلاله نه وي ( يعني نا محرمه ښځه وي).

 

په دې کي هيڅ شک نه شته چي د پردئ ښځي مسحه کول د لاس زنا ده ، لکه څنګه چي په يو حديث کي رسول الله صلی الله عليه وسلم فرمايلي دي: ((العينان تزنيان، واليدان تزنيان، والرجلان تزنيان، والفرج يزني)). مسند احمد ۴۱۴/۱ ، صحيح الجامع ۴۱۲۶.


ژباړه : سترګي زنا کوي ، لاسونه زنا کوي ، پښې هم زنا کوي او فرج ( شرمګاه) هم زنا کوي.

 

نو تاسو وواياست چي په دنيا کي له رسول الله صلی الله عليه وسلم څخه د پاک زړه خاوند بل څوک و ؟

سره له دې چي رسول الله صلی الله عليه وسلم د الله تعالی سپېڅلی او محبوب پيغمبر و خو بيا هم فرمايي :((إني لا أصافح النساء)).
مسند احمد ۳۵۷/۶ ، صحيح الجامع ۲۵۰۹.


ژباړه : يقيناً زه له (پرديو) ښځو سره مصافحه ( د لاس روغبړ) نه کوم.

 

پدې اړوند د مؤمنانو مور حضرت عايشه رضي الله عنها فرمايي : ولا والله ما مست يد رسول الله صلى الله عليه وسلم يدَ امرأةٍ قط غير أنه يبايعهن بالكلام.
صحيح مسلم کتاب الامارة ، باب کيفية النساء.

 

ژباړه : په الله قسم د رسول الله صلی الله عليه وسلم لاس ، هيڅ کله د کومي ( پردۍ) ښځي لاس نه دی مسح کړی ، رسول الله صلی الله عليه وسلم به له ښځو سره په ژبه (خبرو کولو ) سره بيعت کاوه.

 

پاملرنه! هغه خلک دي د الله تعالی څخه ووېرېږي چي خپلو مېرمنو ته له دې وجهي د طلاق اخطار ورکوي چي ؛ ولې زما له ورڼو ( د مېرمني له ليورو) سره د لاس روغبړ نه کوې ، همدارنګه دا هم حرام دي چي کومه ښځه په لاس باندي رومال (دستمال) ، پوړنی او يا هم کومه بله ټوټه اچوي او بيا له سړيو سره د لاس روغبړ کوي. 

 

---------------------------

کتنپلاوی:

د نړۍ ورستۍ روغتیايي څیړني ښيي چي نارینه په اوسط ډول د ورځي ۱۹ واره او ښځي ۱۰ واره د جنسي مقاربت فکر کوي او ځیني کسان په ساعت کي تر دغه لا هم زیات فکر کوي. نو چي د نارینه یا ښځي فطرت داسي جوړ دی چي د ورځي تر لس واره زیات یا په ساعت کي په لسګونو واره ددې کار فکر ورته پیدا کیږي، نو بیا ددغو دوو جنسو اختلاط او ګډ اوسیدل یا د لاس روغبړ به څنګه مناسب او غیرتمن انسان ته د تحمل وړ وي؟ څنګه به ددغه اختلاط او روغبړ څخه عفت په خطره کي نه وي؟

یو غیرتمن انسان خو هیڅکله دا نه سي زغملای! 

 

یقیناً د اسلام احکام د انسانانو د نفس او عزت ساتني لپاره نهايي ضروري او د کفري نړۍ فرهنګ انسان ته مهلک تمامیږي. 

سرته