لیکنه او څېړنه: عبدالغفار جُبیر/ تعلیم الاسلام ویب پاڼه 

موسیقي په اسلام او ساینس کي

(۳۹) 

د منکرين احاديث دلائل او د هغو جواب

۱: منکرین احادیث وايي چي احادیث د صحابه لپاره حجت وو او زموږ لپاره نه دی.

جواب: د منکرین احادیث دغه نظریه باطله ځکه ده، چي ددوی په آند چي د رسول الله ﷺ رسالت صرف د صحابه تر وخت پوري محدود وو، حال داچي لاندي مبارک ایاتونه ددوی ددې باطلي عقیدې رد کوي:

قُلْ يَٰٓأَيُّهَا ٱلنَّاسُ إِنِّى رَسُولُ ٱللَّهِ إِلَيْكُمْ جَمِيعًا ( سورت الاعراف: ۱۵۸)

ژباړه: (اې محمدهﷺ  ووايه) اې انسانانو! زه ستاسو ټولو لوري ته د هغه خداى استازى يم.

وَمَآ أَرْسَلْنَٰكَ إِلَّا كَآفَّةً لِّلنَّاسِ بَشِيرًا وَنَذِيرًا  (سورت سبا: ۲۸)

ژباړه: او [اې پېغمبره (ﷺ)!] موږ ته د ټولو انسانانو لپاره یوازي زېرى وركوونكى او وېروونكى لېږلی یې.

وَمَآ أَرْسَلْنَٰكَ إِلَّا رَحْمَةً لِّلْعَٰلَمِينَ  (سورت الانبیاء: ۱۰۷)

ژباړه: (اې محمده )ﷺ) موږ چي ته لېږلی یې، دا په اصل کښي د نړیوالو په باب زموږ رحمت دى. (موږ د ټولو مخلوقاتو لپاره ته رحمت لېږلى یې.

تَبَارَكَ ٱلَّذِى نَزَّلَ ٱلْفُرْقَانَ عَلَىٰ عَبْدِهِۦ لِيَكُونَ لِلْعَٰلَمِينَ نَذِيرًا (سورت الفرقان: ۱)

ژباړه: هغه ذات ډېر بركتناك دى چي پر خپل بنده باندي یې دغه فرقان (قُرآن) نازل کړ. تر څو چي د ټولو نړيوالو لپاره (د الله د عذاب څخه) وېروونكى وي.

اصلي پوښتنه داده چي د فهم القرآن لپاره د تعلیم د رسول الله ﷺ حاجت شته که یا ؟ که د رسول الله ﷺ د تعلیم ضرورت نه وو نو بیا د رسول الله ﷺ د رالېږلو خو هم ضرورت نه وو، هیښونکې داده چي و صحابه کرامو ته د تعلیم ضرورت وو او موږ ته نسته، حال داچي د قرآنکریم د نزول پر مهال صحابه کرام شاهدان وه، په اسباب د نزول پوره خبر وه، خو موږ ددې ټولو څخه محروم یو، د منکرین حدیث دا باطله عقیده نور په جواب نه ارزي.

۲: ځينی منکرین احادیث وايي چي احادیث حجت دي خو موږ ته د معتمدې ذریعې په سبب نه دي رارسېدلي، نو ځکه یې نه منو.

جواب: په کومو واسطو سره چي مبارک قرآنکریم رارسېدلی دی په هغه واسطو سره مبارک احادیث هم رارسېدلي دي، که واسطې تر اعتراض لاندي وي نو بیا خو منکرین احادیث باید پر قرآنکریم هم اعتماد ونکړي او منکرین قرآن سي، لکه څرنګه چي قرآنکریم موږ ته په تواتر سره رارسېدلی دی همداسي مبارک احادیث هم موږ په تواتر سره رارسېدلي دي، منکرین احادیث په اصل کي له قرآنکریم څخه هم منکر دي.

۳: منکرین احادیث وايی: اخبار احاد (حدیث) پخپله د محدثینو د تصریح مطابق ظنی دي او د ظني تابعداري د قرآنکریم مطابق ممنوع ده (وَمَا يَتَّبِعُ أَكْثَرُهُمْ إِلَّا ظَنًّا ۚ إِنَّ ٱلظَّنَّ لَا يُغْنِى مِنَ ٱلْحَقِّ شَيْـًٔا سورت یونس: ۳۶ ).

ژباړه: حقيقت دا دى چي له دوى څخه زياتره خلك یوازي په انګېرني او ګومان پسي روان دي، په داسي حال کښي چي ګومان، د حق اړتیا يو بڅرى هم نه پوره كوي.

جواب: (ظن) په عربي ژبه کي په دریو معناوو سره راغلی دی، اټکل او تخمین، ظن غالب او یقین، په قرآنکریم کي (ظن) د یقین په معنا سره دی لکه: 

ٱلَّذِينَ يَظُنُّونَ أَنَّهُم مُّلَٰقُوا رَبِّهِمْ وَأَنَّهُمْ إِلَيْهِ رَٰجِعُونَ (سورت البقره: ۴۶)

ژباړه: هغه کسانو (ته سخت نه دی) چي په دې يې باور او یقین  دى چي په پاى كښي له خپل رب سره يو ځاى كېدونكي او د هماغه لوري ته ورګرځېدونکي دي.

وَظَنَّ دَاوُۥدُ أَنَّمَا فَتَنَّٰهُ فَٱسْتَغْفَرَ رَبَّهُۥ وَخَرَّ رَاكِعًا وَأَنَابَ (سورت ص: ۲۴)

ژباړه: داؤد (ع) پوه شو، چي دا خو موږ په اصل کښي پر ده باندي ازمېښت کړی دئ، نو هغه د خپل رب څخه بخښنه وغوښتله او په سجده پريوت او رجوع یې وکړه.

إِنِّى ظَنَنتُ أَنِّى مُلَٰقٍ حِسَابِيَهْ (سورت الحاقه: ۲۰)

ژباړه: زه یقیني وم  چي زه هرو مرو له خپل حساب سره يو ځاى كېدونكى يم."

او داسي نور ډېر ځایونه (ظن) په قرآنکریم کي د (یقین) په معنا سره ده.

ځینو احادیثو ته ظنی ویل سویدي هغه د اټکل او تخمین په معنا سره نه دی بلکي د (ظن غالب) او (یقین) په معنا سره دي.

نوربیا...

www.taleemulislam.net