د دوحې تړون  

لیکنه: مولوي نورالحق مظهري/ تعلیم الاسلام ویب پاڼه 
 
د دوحې د تړون څخه درې کاله پوره سوه، د دې تړون ظاهري او معنوي تأثيرات د هيچا څخه پټ نه دي ځکه دا ورځ د امريکايي اشغال د خاتمې پيلامه او د باطل په وړاندي د حق د برياليتوب څرک وو.

لکه د حديبيې سوله چي د مکې مکرمې د فتحي کيلي ګڼل کيږي د دوحې د تړون لاسليک هم موږ د افغانستان د فتح کيلي بللای سو، ځکه د دوحې د تړون وروسته امريکايانو لکه په جګړه کي چي روحيه بايللې وه په سياسي ډګر کي يې هم روحيه له لاسه ورکړه.

د دوحې تړون د مرحوم اميرالمؤمنين ملا محمد عمر مجاهد رحمه الله هغه خبره رښتيا کړه چي ويل يې: تر امريکا لوی ځواک هم سته چي الله تعالی دی او ارومرو به يو تحول راځي بيا به يې تاسو ووينی. 

د دوحې تړون د امريکايانو موقف صفر ته را ټيټ کړ ځکه پر افغانستان د جګړې په پيل کي ددوی د هغه وخت ولس مشر جورج ډبليو بوش ويل: طالبان به يا تسلميږي يا به وژل کيږي.
خو الحمدلله په سياسي ډګر کي د دوحې تړون زموږ د اميرالمؤمنين خبره رښتيا او د بوش خبره يې درواغ کړه.

د دوحې تړون د ټولي نړۍ په وړاندي د امريکا چلينج داسي وننګوی، چي ټول هوښيار نړيوال ورته حيران سول، ځکه په ۲۰۰۱ م کال کي بوش ټولي نړۍ ته اعلان کړی وو، چي يا به زما سره درېږئ يا به د تروريستانو سره درېږئ، هدف يې طالبان ول.

د دوحې تړون ټولي نړۍ ته د افغانانو سياسي نبوغ په ننداره کښېښووی آن تر دې چي خپله دښمن هم د ا.ا.ا د مذاکراتي پلاوي په پياوړتيا اقرار وکړ. 

موږ ته دا لازمه ده چي د دوحې تړون ته په ډېره درنه سترګه وګورو، تل د هغه ياد وساتو، خپلو مشرانو ته دعا وکړو چي په هر ډګر کي يې الله تعالی همداسي بريالي ولري او د خپل اسلامي نظام د سمبالښت او ساتني لپاره د افغانانو تر مينځ يووالي او اتفاق ته کار وکړو.

www.taleemulislam.net