لیکنه: نعمت الله شاکر/ تعلیم الاسلام ویب پاڼه
د هيواد د جوړېدو اساسي عامل
که دقيق فکر وکړو، نو پوهيږو چي د يوه هيواد د جوړېدلو اساسي عامل د هماغه هيواد اولس دی، چي د خپل هيواد د پرمختګ او ترقۍ اسباب ئې اختيار کړي دي او د ترقۍ په وړاندي موانع او خنډونه ئې تشخيص کړي او ليري کړي دي.
د ارتقا له اسبابو څخه يو سبب دادی، چي هر هيوادوال تر خپله وسعه داخلي توليدات ولري يا ئې په تقويه کي برخه واخلي.
څوک چي وسع ولري، هغه بايد د صنعت، زراعت يا نورو توليدي برخو با کيفيته خدمات ولري.
که دغه وسع نلري، نو د داخلي توليداتو په مصرفولو سره دي داخلي توليدات تقويه کړي.
دولت او نظام هم مکلف دی، چي د توليدوونکو او پانګه اچوونکو پوره ملاتړ وکړي، تر څو د نورو له احتياجه خلاص او پر خپلو مټو تکيه سو، لکه:
۱). پر هغو وارداتو بنديز لګول يا تعرفې پر لوړول، چي ورود ئې د داخلي توليداتو د فلجېدو سبب کيږي؛
۲). د متشبثینو او پانګه اچوونکو حمايه او ملاتړ؛
۳). د نوو تشبثاتو او پانګو اچونو لپاره د مځکو، اوبو، برېښنا او نورو خدماتو لپاره قوي ميکانيزمونه جوړول او تطبيقول؛
۴). د بهرنيو هيوادونو سره داسي تفاهمنامې ايجادول، چي د صنعت، زراعت او نورو تشبثاتو په برخه کي د اړوندو وزارتونو او متشبثینو سره دوامداري همکاري وکړي.
www.taleemulislam.net
