پوښتنه : کومي ښځي چي په کورو کي  زر استعمالوي ايا پر دې زکات سته او که نسته؟

 د سوال کوونکي نوم:  فدامحمد

جواب: د ښځو د سرو او سپینو زرو زېورات او ګېنې که څه هم د استعمال لپاره وي بیا هم که نصاب پوره کړي زکات پکښي شته .
امام ترمذي رحمة الله عليه  د عبد الله بن عمرو رضي الله عنهما څخه روایت رانقل کړی دی ، وایي دوې ښځي و رسول الله صلی الله علیه وسلم   ته راغلې او د دواړو په لاسونو کي د سرو زرو وښي وه ، رسول الله صلی الله علیه وسلم  هغو ته وویل : أَتُؤَدِّيَانِ زَكَاتَهُ ، ایا ددغو سرو زرو زکات ادا کوی ؟ هغو ورته وویل : یا ، رسول الله صلی الله علیه وسلم  ورته وویل : أَتُحِبَّانِ أَنْ يُسَوِّرَكُمَا اللَّهُ بِسُوَارَيْنِ مِنْ نَارٍ ، ایا تاسو دا خوښ لری چي د دغو دوو بنګړیو د زکات نه ورکولو لکبله الله جل جلاله دوه د اور بنګړي در په لاس کړي ؟ هغو ورته وویل : یا، رسول الله صلی الله علیه وسلم  ورته وویل :فَأَدِّيَا زَكَاتَهُ ، نو زکات یې ادا کوی، امام ترمذي رحمة الله عليه  وایي، چي مُثَنَّى بْنُ الصَّبَّاحِ هم د عَمْرِو بْنِ شُعَيْبٍ څخه همدا ډول د ابْنُ لَهِيعَةَ ددې حدیث په شان حدیث رانقل کړی دی خو دوی دواړه د حدیثو په روایت کولو کي کمزوري ګڼل شوي دي. البته د سرو او سپينو زرو څخه ماسيوا نوري ګېڼې لکه جواهرات ، ملغلري او غمیان که د استعمال د پاره وي یعني ښځی د ښکلا او زینت لپاره کار ورڅخه اخلي په لاس او په غاړه کوی یې، هغه که هر څونه قیمت او ارزښت ولري بیا هم زکات پکښي نشته، او که د تجارت او ګټي د پاره وي بیا زکات پکښي لازمیږي .د نورو سامانو او شیانو حکم هم همدا ډول دى که د تجارت لپاره وي او مالک یې د نصاف څښتن وي نو په هغه کي زکات شته او که د استعمال لپاره وي نوپه هغه کي بیا زکات نشته .

د تعليم الاسلام مجلې ۵ ګڼه، د دارالافتاء څانګه