لیکنه: انجینر محمد اسلم اسلم/ تعلیم الاسلام ویب پاڼه

 د ماشومانو د ميراث حق

د میراث حق د پلرونو، زامنو او د هغه نژدې اقاربو او خپلو خپلوانو تر منځ یو مشترک حق دی، چي د اسلام سپېڅلي شریعت خپلو پیروانو ته په خورا ډاګیزه او مشرحه توګه سره بیان کړی دی او په قرآن کریم او د پیغمبر اکرم ( صلی الله علیه وسلم ) په نبوي احادیثو کي او له دې وروسته د فقهې په کتابونو کي دا موضوع په ښه توګه څرګنده او پرته له کوم غموض او ابهام څخه په ډاګه شوې ده؛ نو له همدې کبله مومو چي اسلام کله د یتیم ماشوم د کفالت او پالني څخه بحث کوي او څرګندوي چي پالونکی ئې باید د هغه پالنه د ځان لپاره پلمه ونه ګرځوي تر څو په مرسته ئې د هغه څخه د هغه د نسب حق سلب کړي او دا خبره لوی پروردګار په ښه توګه سره په خپل سپېڅلي کتاب کي په ډاګه کړې ده چي فرمايي: ٱدۡعوهمۡ لأبائهمۡ. ( الأحزاب:۵).

ژباړه: تاسي دوی ( متبني ماشومان ) د هغوي پلرونو ته ( په نسبت کولو سره ) راوبولئ.

او اسلامي شریعت تبني ( یا د بل چا زوی په خپل ځوی ولیتوب سره نیول ) حرام او ناروا ګرځولی دی، او په قرآن کریم کي د مور قدر او منزلت ډېر هسک او لوړ بیان بیان کړل شوی دی، چي په دې اړه خالق تعالی فرمايي: وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا. (الإسراء: ۲۳.
ژباړه: او  اې انسانه ستا پروردګار امر کړی دی، چي له لوی الله تعالی پرته د بل چا عبادت مه کوه او د خپل مور او پلار سره ( په ځانګړي توګه د هغوی د زړښت او عاجزۍ په پړاو کي ) نیکي وکړه.

www.taleemulislam.net