لیکنه: مولوي نورالحق مظهري / تعلیم الاسلام ویب پاڼه

روژه او صله رحمي

یادونه: (روژه او صله رحمي) لیکنه یو ځل مخکي (۱۴۰۱هـ ش) کال کي خپره سوې، د یادي لیکني اهمیت ته په کتو يې یو ځل بیا خپروو. 

اې روژاتيانو! هر وخت صله رحمي وکړئ خو د روژې په مبارکه مياشت کي بيا ځانګړې او ډېره صله رحمي وکړئ! د صله رحمي وصل کول او مراعات کول د هر مسلمان مسئوليت دی الله جل جلاله فرمايي: وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ.[النساء: الآية 1] 

ژباړه: د هغه الله څخه ووېرېږئ چي په نامه يې تاسو سوال کوی او د صله رحمي د پرې کولو څخه ووېرېږئ.

همدا راز رسول الله صلی الله عليه وسلم فرمايي: لا يدخل الجنة قاطع.[ متفق عليه] 

ژباړه: جنت ته هغه څوک نه داخليږي چي صله رحمي پرې کوي.

همدا راز رسول الله صلي الله عليه وسلم فرمايي: من سره أن يبسط له في رزقه وينسأ له في أثره فليصل رحمه. [متفق عليه] 

ژباړه: څوک چي غواړي په رزق کي يې پيراخي راسي او عمر يې ډېر سي نو صله رحمي دي وصل کړي.

د صله رحمي ګټي او فايدې

۱- صله رحمي پر الله او ورځي د آخرت د ايمان راوړلو شعار دئ.

۲ - صله رحمي د رزق د پیراخوالي او د عمر د اوږدوالي سبب کيږي.

۳ - د صله رحمي په مراعات کولو باندي انسان د الله پاک د رحمت مستحق ګرځي.

۴ - صله رحمي جنت ته د داخلېدلو د اسبابو څخه لوی سبب دئ.

۵ - په صله رحمي باندي د انسان ګناهونه خرابيږي.

۶ - په صله رحمي باندي کلي او ښارونه آباديږي.

۷- په صله رحمي باندي د انسان خاتمه سميږي.

۸- په صله رحمي باندي د مراعات کوونکي مرتبه لوييږي او عزت يې ډېريږي.

۹- په صله رحمي باندي د انسان لپاره ښه نوم پاتيږي.

۱۰ - په صله رحمي باندي محبت ډېريږي او عاميږي.

۱۱ - صله رحمي هغه شی دی، چي  ټولو اسماني آديانو يې پر اهميت اتفاق کړی دئ.

۱۲ - صله رحمي د انساني فطرت تقاضا ده.

۱۳ - صله رحمي د نفس پر سخاوت، د سينې پر پيراخوالي، د خلقت پر ښه والي او پر حسن وفاء باندي دلالت کوونکې ده. 

صله رحمي څشي ده؟

صله رحمي و دېته وايي چي انسان د خپلو خپلوانو سره، تفاوت نه لري که د نسب لخوا خپلوان وي او که د دوستۍ او نکاح په سبب خپلوان وي احسان او نيکي وکړي او د دوی سره دوستانه او صميمي رابطه ټينګه وساتي.

صله رحمي پدې باندي کيږي چي: 

۱ -  انسان د خپلو خپلوانو ملاقات او زيارت ته ولاړ سي.

۲ - د دوی د احوالو پوښتنه وکړي.

۳ - دوی ته سوغات او ډالۍ ورکړي.

۴ - د ضرورت په وخت کي د دوی څخه يو شی وغواړي.

۵ - د دوی مسکين او اړ انسان ته صدقه او خيرات ورکړي.

۶- د مشرانو او سرمايه دارانو سره يې نرمي وکړي.

۷- د لويانو احترام يې وکړي.

۸- او پر کشرانو يې شفقت او مهرباني وکړي.

منبع: تحف رمضانیة

www.taleemulislam.net