ژباړه او ټولونه: نوید احمد / تعلیم الاسلام ویب پاڼه

اوبه حیاتي ماده ده، هغه لوی نعمت دی چي اسلام يې د هر بې ځایه څاڅکي د سپمولو حکم کړی دی. د اوبو په برکت عبادات ترسره کیږي او د ژوند مهمي چاري لکه بریښنا او انرژي (تیل) د اوبو سره مستقیم تړاو لري. په نړۍ کي داسي هیوادونه، ښارونه او علاقې سته چي د اوبو د قحطۍ څخه هره ورځ کړیږي.

که د اوبو څاڅکي وسپموو، لوی الهي حکم به مو عملي کړی وي او د اوبو د قحطۍ څخه به ان شاء الله په امن یو. لاندي څو لاري د اوبو ډيره سپما راولي:

۱: د مسواک یا برس کارولو په وخت کي نولکه بنده کړئ.

۲: یو خالي بوتل چي د ډبرو ډک وي د کموډ په ټانکۍ کي کښېږدئ ترڅو هر ځل لږ اوبه ور څخه خارج سي.

۳: د اوبو هغه نولکیاني او پیپونه ژر تر ژره اصلاح کړئ چي لیک ولري او اوبه تویوي.

۴: د کموډ څخه د کثافت دانۍ کار مه اخلئ چي کچره ور غورځوی او بیا اوبه پسي توی وی.

۵: د غسل کولو په وخت کي دوې دقیقې سپما راولی. هغه اله په اوپاش کي نصب کړئ چي هوا او اوبه سره ګډوي.

۶: موټر او وسائط په پیپ مه پریلوئ بلکي په یو سطل اوبو یې پریلوئ.

۷: د موټر پریوللو د پاره بوتلي سپرې وکاروئ (کوم چي هنداري په پریولل کیږي).

۸: د چمن د اوبو کولو لپاره که د پیپ پر ځای پاشونکې نولکه یا اوپاش استعمال سي نو زیاتي اوبه سپمیږي.

۹: د اوبو د ټانکۍ پیپ باغچې یا حوض ته وصل کړئ.

۱۰: ماشومانو ته د اوبو د سپما لاري چاري ور زده کړئ (هغه د بازیو شیان را کم کړئ چي اوبه کاروي.)

۱۱: کله چي کالي پریولی نو ماشین ډک کړئ ترڅو د بیا بیا پریولو په وخت کي اوبه وسپمیږي.

۱۲: د اوبو د سپما د اسبابو یو تجارتي کاروبار شروع کړئ.

څیړني ښيي چي تازه اوبه د ټولي مځکي ډيره لږ برخه تشکیلوي پداسي حال کي چي د مځکي ۷۰٪ برخه په اوبو پوښلې ده خو ددې اوبو څخه پر مځکه صرف ۲،۵٪ تازه اوبه لرو هغه پاته يې مالګیني او د بحر اوبه دي. پدې ۲،۵٪ کي صرف ۱٪ تازه اوبو په اسانۍ سره ترلاسه کیږي چي اکثره یې په واورو کي بندي دي. خلاصه دا چي یوازي ۰،۰۰۷٪ د مځکي اوبه سته چي د نړۍ ۶،۸ میلیارډه انسانان اوبوي او تغذیه کوي. (NG)

یو څاڅکۍ اوبه ساتل لوی بدلون راولي.