لیکنه : عبدالسلام حنفي / تعلیم الاسلام ویب پاڼه
د مسلمان ځوانانو د ګمراه کولو لپاره د کفارو له دسیسو څخه یو هم د ښځو څخه کار اخیستل دي.
ښځي لکه څنګه چي د کافرانو د مسلمانیدلو مخه نیسي همدارنګه په ارتداد کي هم ډیري مؤثري دي. د تبشیریانو ( د عیسايي داعیانو) په یوه مجله کي لیکلي وو چي یوه ښځه په دعوت کي دومره تاثیرناکه ده چي سل (۱۰۰ ) سړي هغومره اغیزمن نه دي. مجلي په دې زور اچولي وو، چي باید په تبشیریت (د عیسوي مذهب په دعوت) کي د ښځو څخه زیات کار واخستلي شي. د همدې خبري مصداق موږ په افغانستان کي په سترګو ولید چي یو شمېر ځوانان د فاحشو ښځو په واسطه سره فکراً یا مذهباً مرتد شول. او د اسلام څخه کمونیزم یا ډیمکراسۍ یا سیکولرزم ته واوښتل . د ښځو په همدې زیات مؤثریت باندي کفار ښه پوهیږي د همدې کبله د ښځو د حقوقو (او بهر ته د را ایستلو) په نامه باندي چیغي وهي حال دا چې (بل اړخ کي یې د لکونو ښځو) سړي د هډوکو سره وکرپول حقوق يې ورته د پښو لاندي کړل، ښځي یې ور کونډي او میندي يې ور بوري کړې، خو د نارینه د حقوقو په نامه يې هیڅکله غږ پورته نه کړ او نه یې د هغو ښځو په اړه څه وویل چي په بمباریو کي يې وژني.
انګریزانو او همدارنګه امریکایانو د خپل استعمار په وخت کي په اسلامي هیوادونو کي فاحش ځایونه جوړي کړل او په بازارونو کي يي د فتنه ګرو ښځو د پاره دوکانونه او سرایونه پرانیستل ترڅو د اسلام ځوانان بې لاري کړي او قرانکریم پرينږدي چې د مسجد څخه راووځي او د ټولني اصلاح په لاس کې واخلي.
خو کله چې په کومه ټولنه کې په ښځو باندي اسلامي قوانین نافذ شي او د هغوی خپل اسلامي حقوق ورکړل شي، چې هغه مثلا بغیر له ضرورت څخه د کور څخه د باندي وتلو څخه منع کول او یا ورباندي د حجاب د اغوستلو تاکید کول یا داسي نور ښځو لره مصؤن احکام نو ټوله کفري نړۍ بیا په ډیره خواشینۍ سره دا خبره ذکر کوي چې دا کار د ښځو په حقوقو باندي تیری دی او حال دا چي دوی د ښځو حقوق هیڅ نه پیژني. دوی دا خبره ځکه کوي چې که چیرته کوم هیواد یا ټولنه د اسلام د تعمیل په لور روانه وي نو دوی پوهیږي چې هلته بیا زموږ ناولي اهداف نه عملي کیږي. نو مسلمانان دي نور د ساده ګۍ څخه کار نه اخلي او نه دي مسلماناني ښځي د دوی په هر ښایسته عنوان تیر وځي او د اسلام ښایسته کلا دي نه پرېږدي.
