عبدالحميد ابن جبير وايي: زه د سعيد ابن مصيب رحمة الله عليه (مشهور تابعي) سره ناست وم چي ده دا حديث را ته بيان کړی: زما نيکه چي حزن (رضي الله عنه) نومېدی نو زما نيکه (حزن) رسول الله صلی الله عليه وسلم ته ورغلی. نبي کريم صلی الله عليه وسلم زما د نيکه څخه پوښتنه وکړه چي ستاسو نوم څه شي دی؟ زما نيکه ورته وويل چي زما نوم حزن دی نو رسول الله صلی الله عليه وسلم ورته وفرمايل: يا! ته سهل يې! حزن ورته وويل چي زه هغه نوم نه بدلوم چي زما پلار پر ما ايښی دی. نو سعيد ابن مصيب رحمة الله عليه وايي چي د هم هغه وخت څخه زموږ په کورنۍ کي سخت مزاجي او سخت طبيعتي سته. رواه بخاري
ددې حديث شريف مقصد دا دی چي ښه معنی لرونکی نوم بايد وټاکل سي ځکه نوم پر انسان اثر کوي. حزن سخت او زيږ شي ته وايي نو ځکه رسول اکرم صلی الله عليه وسلم ورته وفرمايل چي ته سهل پر ځان کښېږده معنی نرم مزاجه خو ده خپل نوم ته تغير ور نه کړی نو ځکه د دوی په کورنۍ کي سخت مزاجه پاته وه.
