مخکي مو ولوستل چي نکاح په ایجاب او قبول تړل کیږي ، هغه دوه کسان چي د شاهدانو په حضور
 کي ایجاب او قبول کوي هغو ته د نکاح تړونکي ويل کېږي .

نکاح هم د نورو معاملاتو په شان تړون دى ، د فقهي په اصطلاح کي تړون ته عَقْد وایي ، کوم دوه کسان چي تر منځ عَقْد تړي هغو دوو ته بيا مُتَعَاقِدان یعنی تړونکي ویل کیږي . د نکاح تړونکي د صلاحیت او واک له مخي څلور ډوله دي ، چي د اصیل ، ولي ، وکیل او فضولي په نامه یادیږي او په لاندي ډول ورباندي رڼا اچوو.

اصیل

اصیل هغه تړونکي ته وایي چي هغه د داسي تړون ایجاب یا قبول کوي چي هغه تړون دی د خپل ځان د پاره کوي .
نارینه او ښځه چي یو د بل سره په نکاح تړلو راضي سي ، که دوى دوه د شاهدانو په حضور کي یو د نکاح ایجاب او بل یې قبول وکړي ، نکاح يې تر منځ وتړل سوه ، په دغه تړون کي دوى هر یو اصیل بلل کیږي ، ځکه دوى هر یوه د نکاح د تړون ایجاب او قبول پخپله د خپلو ځانونو د پاره وکړى .

ماخذ: فقه المبتدي، دوهم ټوک- نکاح