هغه ښځي چي د نَسَبِي قرابت او خپلوۍ لكبله هيڅ كله نكاح نه ورسره تړل كيږي هغوى ته نَسَبِي مُحَرَّمَاتُ وايي او په لاندي ډول دي :
مور ، اناګاني ، انا كه د مور مور وي او كه د پلار مور وي ، كه نژدې انا وي او كه ليري انا وي ټولي مُحَرَّمَاتُ دي  .
 لور ، لمسۍ ، كړوسۍ دا هم ټولي مُحَرَّمَاتُ دي ، دا كه د لور د اولادې څخه وي ، د لور لور وي يا د لور لمسۍ وي او كه د زوى د اولادې څخه وي ټولي مُحَرَّمَاتُ دي .

خور ، خورځه همدا ډول د خورځې لوڼي ، لمسياني كړوسياني ټولي مُحَرَّمَاتُ دي .
ورېره د ورېرې لوڼي ، لمسياني او كړوسياني ټولي د سړي مُحَرَّمَاتُ دي هيڅ كله يې نكاح نه ورسره صحيح كيږي .
عمه همدا راز د مور او د پلار عمه ګاني دغه ډول د نيكه عمه ګاني ټولي د سړي مُحَرَّمَاتُ دي .
خاله همدا ډول د مور او د پلار خاله ګاني ، دغه راز د نيكه خاله ګاني هم ټولي د سړي مُحَرَّمَاتُ دي
 هيڅ كله يې هم نكاح نه ورسره صحيح کيږي.

ماخذ: فقه المبتدي، دريم ټوک-نکاح