د نبي(ص)پوښتني او د صحابه کرامو (رض)ځوابونه

لیکنه : نصیب الله (ځلاند)/تعلیم الاسلام ویب پاڼه

یو وخت رسول الله(ص) د خپلوصحابه کراموسره ناست ؤ او دهغوی څخه يې پوښتني کولې، نولومړئ یې د حضرت ابوبکرالصدیق(رض) څخه پوښتنه وکړه او ويې ویل: یا ابابکر! په دنیوي شیانوکې دي څه شي خوښ دی؟

حضرت ابوبکرالصدیق(رض) وویل:
له دنیا څخه مي درې شیان خوښ دی:
لومړئ: ستا په حضورکې کښینستل.
دوهم: ستا مبارک مخ ته کتل.
دریم: پرتا باندي خپل مال مصرفول.

رسول الله(ص)دوهمه پوښتنه د حضرت عمر(رض) څخه وکړه او وې فرمایل: ستا څه شي خوښ دي یا عمر؟

حضرت عمرفاروق(رض)وویل: زما هم له دنیوي شیانوڅخه درې خوښ دي:
لومړئ: امربالمعروف که څه هم په پټه سره وي.
دوهم: نهی له منکره که څه هم په ښکاره وي.
دریم: حق ویل که څه هم ترخه وي.

نبي صلی الله علیه والسلام بیا وفرمایل: اوستا څه شي خوښ دي یا عثمان؟

حضرت عثمان ذي النورین رضی الله عنه وویل:
زماهم له دنیوي شیانوڅخه درې شیان خوښ دي:
لومړئ: د خوړو ورکول(سخا).
دوهم: د سلام نشرول(السلام علیکم ویل).
دریم: د شپې په هغه برخه کې لمونځ کول چې خلګ بیده وي.

رسول الله(ص) بیاوفرمایل: ستا څه شي خوښ دي یا علي؟

حضرت علي(رض)وویل:زماهم له دنیوي شیانوڅخه درې شیان خوښ دي.
لومړئ: د میلمه عزت کول.
دوهم: د دوبې په ګرمیوکي روژه نیول.
دریم: په توره د اسلام دښمن وهل.

اوبیا رسول الله(ص)حضرت ابوذرالغفاري(رض)ته وفرمایل:اوستا څه شي خوښ دي یا اباذر؟

حضرت ابوذر(رض)وویل: زماپه دنیا کي درې شیان خوښ دي:
لومړئ: لوږه.
دوهم: ناروغي.
دریم: مرګ.

جناب رسول الله (ص)وفرمایل: ولي؟

ابوذر(رض)وویل: لوږه مي ددې دپاره خوښه ده چې زړه نرموي.
ناروغي مي ددې د پاره خوښه ده چې ګناهونه رژوي.
مرګ مي ددې دپاره خوښ دی چې دخپل رب(ج)ملاقات ته ورځم.

ماخذ : محمدي ملغلرۍ.

www.taleemulislam.net