لیکنه: نعمت الله شاکر/ تعلیم الاسلام ویب پاڼه

په راتلونکې اونۍ کي لوی اختر دی الحمدلله!

دا اختر د نورو ځانګړتياوو تر څنګ د قربانۍ اختر هم دئ، نو غواړم څو توصيې او مشورې درته وليکم:

۱.  که مو قرباني په وسع کي وي، نو حتما قرباني وکړئ؛

۲. سر له اوس څخه د عبادت او ثواب نيت وکړئ، له پيغور څخه د خلاصون په نيت قرباني کول، د اختر په ورځو کي په کور کي د غوښو د شتون په نيت او نورو هغو نيتونو قرباني کول، چي په شريعت کي په هغه نيت عبادت صحت ونلري، نو د اجر او ثواب پر ځای د عذاب سبب کيږي؛

۳. که مو په وسع کي نه وي، نو ځانونه تر قرضونو مه لاندي کوئ او که پوروړي ياست، نو د هغه قرضونو اداء کېدو په فکر کي سئ او د هغه څه التزام مه کوئ، چي پر تاسو لازم نه وي؛

۴. که مو قرباني کوله، نو د نورو خلکو سره په غوايي يا اوښ کي مه شريکيږئ؛ ځکه په هغه کي خورا حساس مسائل او شرطونه سته، چي عملي کول او پوره کول ئې ستونزمن دي؛

۵. د اختري تر کولو او قربانۍ وروسته د اختري غوښي درې ځايه کړئ، يوه برخه خپلي کورنۍ ته راوګرځوئ، يوه برخه د خپلو ميلمنو لپاره راوګرځوئ او يوه برخه خيرات کړئ.

۶. که مو قرباني وکړله، نو په ګاونډيانو او دوستانو کي هغو کورونو ته د غوښو برخي واستوئ، چي هغوی قرباني نه کوي يا ئې نور خلک نه وراستوي. ځيني خلک د غوښو په ليږلو کي رقابتونه او مناسبات کوي، هغه چاته ئې ورليږي چي هغه ئې هم ورته رااستوي.

نوټ: حق تعالی دي هر مسلمان ته د قربانۍ کولو د توفيق تر څنګ د صحيح نيت توفيق ورکړي.

www.taleemulislam.net