د (نکاح) نورې ليکنې
تازه سرليکونه
بېلابېلې ليکنې
د رجعي طلاق حکم
وړاندي مو ولوستل چي رجعي طلاق مَدخُولُ بِهَا یعني را واده سوي ښځي ته ورکول کیږي .
مَدخُولُ بِهَا ښځه د طلاق عده تېروي د رجعي طلاق حکم دا دی چي په عده کي دننه که مېړه یې وغواړي و دې ښځي ته رجوع کولای سي ، د رجوع په کولو یې دا ښځه بیرته د هغه مخکنۍ نکاح پر بنسټ ښځه ګرځي .
د رجعي طلاق په رجوع کي د نکاح تړلو ته اړتیا نسته او نه د ښځي رضایت او خوښۍ ته کتل کیږي په رجعي طلاق کي رجوع په ژبني ډول هم کېدلای سي او په عملي ډول هم کېدلای سي .
که څوک خپلي ښځي ته رجعي طلاق ورکړي او د عدې د پوره کیدلو ترمخه ورسره لاس په غاړه سي یا یې مچ کړي ، یا جماع او نژدېکت ورسره وکړي دا ټول عملي رجوع ګڼل کیږي ، په همدې رجوع سره یې ښځه په مخکنۍ نکاح په نکاح کي پاته کیږي . البته د دغي ښځي فقط یو طلاق پاتيږي چي د هغه وروسته یې لا هم تر منځ نکاح تړل کېدلای سي .
که دوهم طلاق په صریحو الفاظو وو هغه رجعي طلاق دى او په عده کي دننه رجوع ورته کولای سي .
ژبني رجوع دې ته وایي چي په خوله ووایي : ما خپلي ښځي ته رجوع کړې ده ، د همدغي وینا په کولو يې مخکنۍ نکاح تر منځ پاته کیږي .
ژبنۍ رجوع که څه هم بېله شاهدانو څخه هم صحیح کیږي خو بیا هم مستحب دا ده چي سړی د شاهدانو په حضور کي ووایي : ما خپلي ښځي ته رجوع کړې ده ترڅو د ښځي د انکار مخه ونیول سي .
که مېړه ښځي ته ووايي : ما رجوع درته کړېده او ښځه سمدستي په جواب کی ورته ووايي : زما عده پوره سوې ده ، د ابوحنیفة رحمة الله علیه په آند دا رجوع نه صحیح کیږي ، البته د ملګرو په آند يې رجوع صحیح ګڼل کیږي ، ځکه تر همدې دمه لا ښځه په عده کي شمېرل کیږي .
په رجعي طلاق کي که عده پوره سي ، د عدې تر ختمېدلو څخه وروسته یې مېړه رجوع نسي ورته کولای البته نوې نکاح یې تر منځ تړل کېدلای سي .
نوې نکاح د هغو شرایطو په ړنا کي تړل کیږي کوم چي په لومړي ځل نکاح تړلو کي په همهغو شرایطو نکاح صحیح کیدله یعني هم به ښځه په راضي وي ، هم به د شاهدانو په حضور کي نکاح تړل کیږي او هم به ولور ورته ټاکل کیږي .
ماخذ: فقه المبتدي، دوهم ټوک- نکاح
مؤلف: مولوي محمد عمر خطابي
ورته ليکنې:
تبصره
