تازه سرليکونه
د (چاڼ سوي مضامين) نورې ليکنې
تازه سرليکونه
بېلابېلې ليکنې
د دعوت په وړاندي شيطاني چالونه
  تعلیم الاسلام
  October 12, 2014
  0
لیکنه: مولوي محمد عمر خطابي
  آيا تاسو پوهېږئ، چي د اسلام د مقدس دين د بقا او خپراوي له پاره دعوت څومره زيات د اهميت وړ کار دئ ؟ آيا تاسو پوهېږئ، چي د دعوت په مقابل کي شيطان دکوم ډول دسيسو او چلونو څخه کار اخلي ؟ 
 
       دا هغه موضوع ده، چي په دې ځاى کي به په لنډ ډول بحث پر کوو ترڅو د دعوت اهميت او د دعوت څانګي وپېژنو او هم د دعوت په وړاندي د شيطان او د هغه د لښکرو د چلونو او دسيسو څخه خبر واوسو .
 
    د دعوت د اهميت له پاره فقط دومره وايو، چي هر هغه کار چي شيطان د هغه سره زيات حساسيت او نفرت لري همغه کار د اسلام د بقا او هم د شيطان د شرارتونو څخه د انسانانو د ژغورني اغېزمن کار ګڼل کيږي، ځکه هر شى د هغه په ضد پېژندل کيږي نو ځکه کوم کار چي شيطان زيات نفرت ځني کوي هغه د اسلام د خپراوي او د انسانانو د لارښوني له پاره زښت زيات اهميت لري د بېلګي په ډول به يې نمونه درته وښوو : پاک رسول صلی الله علیه وسلم  فرمايلي : څه مهال چي مؤذن آذان ناري کړي نو شيطان په تېښته سي تر داسي حده فرار کوي تر څو د مؤذن آواز يې تر غوږ نسي او د تلو تلو په حالت کي يې د کښې لخوا آواز لرونکي بادونه هم وځي، د اذان څخه وروسته مخ راکوي خو څه مهال چي د اقامت آواز پورته سي نو بيا شيطان په تېښته سي ( و له ضراط ) يعني په بادو سي تر څو اقامت وا نه وري، د اقامت څخه وروسته بيا مخ راکوي او لمونځ کونکي ته په لمانځه کي وسوسې اچوي، هغه څه ور يادوي کوم چي د لمانځه دباندي يې ياد نه وه تر داسي اندازې چي د شيطان د وسوسو لکبله لمونځ کونکي ته نه معلوميږي، چي ده څو رکعتونه لمونځ ادا کړ .
 
    وړونو ! ښه غور وکړئ د اذان او اقامت پر مهال د شيطان څخه ږغ لرونکي بادونه وځي او په تېښته کيږي خو د لمانځه پر مهال بيرته راځي او لمونځ کونکي ته وسوسې وراچوي .
 
   آيا تاسو پوهيږئ، چي شيطان ولي د اذان او اقامت سره دونه زياته کرکه او نفرت کوي ؟ آن تر دې چي د اورېدلو توان يې لا هم نه لري او د مؤذن د آواز د اخلالولو له پاره د کښې لخوا ږغ لرونکي بادونو باسي، دا ځکه چي آذان او اقامت دعوت دئ، د دعوت د کار څخه شيطان او د هغه لښکري زياته کرکه او نفرت کوي او د کښې په بادونو د داعي آواز مخدوش او اخلالوي ، تاسو د آذان وروسته دعا ته ځېر سئ هلته پاک رسول صلی الله علیه وسلم  اذان په الدعوة التامة يعني په بشپړ دعوت ياد کړى دئ لکه څنګه چي فرمايي : اللَّهُمَّ رَبَّ هَذِهِ الدَّعْوَةِ التَّامَّةِ وَالصَّلَاةِ الْقَائِمَةِ آتِ مُحَمَّدًا الْوَسِيلَةَ وَالْفَضِيلَةَ وَابْعَثْهُ مَقَامًا مَحْمُودًا الَّذِي وَعَدْتَهُ
 
ژباړه : يا الله ! اې د دې کامل دعوت او تل پاتي لمانځه څښتنه ! محمد صلی الله علیه وسلم ته د وسيلې مقام او فضيلت ورکړه او د مقام محمود ستايل سوئ ځاى کوم چي وعده دي ورسره کړې ده ورکړه .
 
که د آذان کلماتو ته ځير سو نو راته ښکاره به سي چي واقعا آذان کامل دعوت دئ، ځکه د آذان په پيل کي الله اکبر ويل کېږي يعني الله جل جلاله  تر هر شي لوى ذات دئ ترڅو ټول انسانان او پېرانان الله جل جلاله  ته د بندګۍ سرونه ټيټ کړي، ورپسې (اشهد ان لا اله الا الله)  يعني د الله جل جلاله  د وحدانيت او يووالي اعلان کېږي ترڅو ټول انسانان او پېرانان يوازي او يوازي الله جل جلاله  خپل معبود وګرځوي او بېله الله جل جلاله  څخه د بل چا او د بل شي بنده ګي او عبادت و نه کړي، ورپسې ( اشهد ان محمدا رسول الله) د محمد  صلی الله علیه وسلم  رسالت اعلانېږي ترڅو ټول انسانان او پېرانان د الله جل جلاله  عبادت د محمد صلی الله علیه وسلم  پر طريقه وکړي او د هغه تګ لاره خپله کړي، ورپسې لمانځه ته بلنه ورکول کېږي او ورپسې خلکو ته ښوول کيږي، چي ستاسو د دنيا او آخرت کاميابي په لمانځه کي ده نو (حي علي الصلاة ) د جماعت لمانځه ته هڅه راوکړئ .
 
    ښکاره خبره ده، چي د الله جل جلاله  د کبريايي او وحدانيت آواز پورته کول د محمد رسول الله صلی الله علیه وسلم  د رسالت اعلان او لمانځه او د کاميابۍ عمل ته بلنه او دعوت ورکول پر شيطان باندي ترغشو لا هم سخت واري دي، نو ځکه يې د اورېدلو توان لا هم نه لري بلکي تښتي او د داعي د آواز د ټيټولو له پاره يې نور څه خو په وسع کي نه دي بس په تلو تلو کي بادونونه باسي ترڅو په خپلو بادونو د خپلو غوږونو او د خپلو پيروانو د غوږونو شپېلۍ د حق له اورېدلو څخه کاڼه او دپ کړي .
 
لکه څه ډول چي شيطان د آذان څخه بد وړي او په بادونو يې اخلالوي دغه ډول د دين د هر ډول دعوت او بلني په وړاندي به کله هم شيطانان لاس تر زنه نه کښېني بلکي څومره چي وکولاى سي د اسلام د مقدس دين د خپراوي مخه به نيسي، د دعوت د مخنيوي له پاره تر هر څه وړاندي شيطانان خپل شيطاني غشي د داعي پر لور غورځوي او پر داعي باندي تهمت او تورونه لګوي ترڅو خلک يې پر خبرو باور و نه کړي، خلک د داعي د خبرو د اورېدلو څخه راګرځوي ترڅو د حق د اورېدلو څخه متاثره نسي که د تهمت او اخلالولو هڅي يې شنډي سي نو بيا واک لرونکي شيطانان د ګواښ او تهديد لاره هم خپلوي، همدا د شيطان او د هغه د لښکرو د دعوت سره د مقابلې مورثي تګ لاره ده.
 
   تاسو وګورئ تر ټولو ستر داعيان او بلونکي انبياء او رسولان علیهم السلام دي. په قرآن پاک کي الله جل جلاله  د شيطان او د هغه د لښکرو يعني کافرانو هغه چلونه او دسيسې يادي کړي دي کوم چي د انبياوو او رسولانو د دعوت د مخنيوي له پاره يې کار ترې اخيستئ. هر کافر قوم خپل نبي او رسول د تور او تهمت په غشو ويشتئ هغوئ ته به يې کله ليوني ، کله کاهن، کله شاعر او کله جادوګر وايه پر حضرت محمد صلی الله علیه وسلم باندي هم کافرانو دا ډول تورونه لګول لکه څنګه چي الله  جل جلاله  فرمايي :
  وَيَقُولُونَ أَئِنَّا لَتَارِكُوا آَلِهَتِنَا لِشَاعِرٍ مَجْنُونٍ (٣٦ الصافات ) 
ژباړه : او دوئ وايي ايا موږ به د شاعر او ليوني د وينا له کبله خپل خدايان پرېږدو ؟
 
يعني کله هم د محمد رسول الله صلی الله علیه وسلم  په وينا د خپلو بتانو عبادت نه پرېږدو، کافرانو پر محمد صلی الله علیه وسلم باندي د شاعر او ليوني او دې ته ورته تورونه او تهمتونه، ځکه لګول ترڅو خلک پر بې باوره کړي او و خبرو ته يې غوږ و نه نيسي همدا ډول د کافرانو د مشرانو بله دسيسه د محمدي  دعوت په وړاندي دا وه، چي خپل اتباع او پيروان يې د قرآن د اورېدلو څخه منع کول لکه څنګه چي يې الله جل جلاله  حکايت کوي : وَقَالَ الَّذِينَ كَفَرُوا لَا تَسْمَعُوا لِهَذَا الْقُرْآَنِ وَالْغَوْا فِيهِ لَعَلَّكُمْ تَغْلِبُونَ (سورت فصلت ايت ٢٦)
ژباړه : او هغو کسانو چي کفر يې کاوه ويل : تاسو و دې قرآن ته غوږ مه نيسئ او د قرآن د تلاوت پر مهال لغو ويناوي کوئ ښايي تاسو به غالب سئ .
 
    مسلمانانو وړونو ! د اسلام دښمنان او د هغوئ اجيران به هيڅکله هم د اسلامي دعوت په وړاندي چپه خوله پاتي نيسي او د دعوت د مخنيوي له پاره به هرومرو د هغو اوزارو څخه کار اخلي کوم چي د مخکنيو څخه په ميراث ور پاته سوي دي .
 
     د پورتنيو کرښو څخه د دعوت په وړاندي د شيطان او د هغه د پيروانو ځيني هغه چلونه او دسيسې هم راته معلومي سوې، کوم چي په هغو سره د دعوت مخه نيسي خو پوښتنه دا ده چي موږ او تاسو به د شيطاني چلونو په وړاندي څه کوو ؟ ايا د هغو ادارو او اشخاصو ملاتړ او تائيد به کوو کوم چي د اسلام د مقدس دين د خپراوي له پاره يې د همت او مړاني ليڅي رانغښتي دي او د اسلام د مقدس دين د دعوت او خپراوي ستره دنده چي څوک يې په يوه شکل او څوک يې په بل شکل مخ په وړاندي بيايي ؟ او که به د دعوت په وړاندي د شيطاني چلونو په لومي کي  ښکاريږو ؟ 
 
    معاذ الله ! عقلمن مؤمن به هيڅکله هم د دعوت په وړاندي د شيطان او د هغه د لښکرو و غولونکو تبليغاتو ته غوږ نيسي او نه به د هغوئ پر شيطاني رنګول سوو پرپاګنډو باور اواعتماد وکړي بلکي تل به د هغو ادارو او اشخاصو ملاتړ او تائيد کوي ،کوم چي د الله جل جلاله  سپېڅلى دين، د الله جل جلاله  کلام او د الله د رسول ويناوي او ارشادات تر نورو رسوي آن تر دې چي عقلمن او بااحساسه مؤمن تل داعي اوسيږي او په هره سيمه او په هر مهال کي به د اسلامي دعوت مل وي او د دعوت د هري څانګي ملا تړ او تائيد به کوي .
 
درنو لوستونکو ! د دعوت د څانګو څخه يوه څانګه د تعليم الاسلام راډيو ده الحمد لله دا هغه اداره ده چي نن ورځ يې د دعوت آواز نه يوازي د کندهار په سيمه کي بلکي (www.taleemulislam-radio.com) ويب پاڼي څخه يې د نيټ د لاري د نړۍ تر ګوټ ګوټ آواز رسيږي او دا هغه منل سوې او د اعتماد وړ اداره ده، چي د نرو او ښځو ، ځوانانو او مشرانو ، علماوو او عوامو په زړونو کي يې د محبوبيت کچه دومره زياته او هم پر زياتېدو ده، چي موږ د هغوئ د دې الحب في الله څخه د منني تعبير کولاى نه سو خو د هغوئ په مننه کي دومره ويلاى سو، چي الله جل جلاله  دي دوئ خوښ او محبوب وګرځوي، چي د هغه د دين له کبله دوئ د همدې ادارې سره محبت او مينه لري .
 
    د تعليم الاسلام راډيو ، د تعليم الاسلام ويب پاڼه او د تعليم الاسلام مهالنۍ مجله د دعوت په ډګر کي ډېر ستر وسايل دي، د همدې وسايلو د لاري الحمد لله نن ورځ د کندهار په سيمه کي هر نارينه او ښځينه، لوئ او کوچنى په هر ځاى کي کولاى سي چي ديني زده کړه وکړي، د علماء کرامو وعظونه او ويناوي واوري او هم ور پېښ سوي مسايل وپوښتي، همدا رنګه د نړۍ په ګوټ ګوټ کي هغوئ کولاى سي، چي د نيټ د لاري د همدې ادارې د تعليمي پروګرامونو څخه برخمن سي  .
 
    د تعليم الاسلام راډيو د هر عالم او داعي پر مخ خلاصه او پرانيستې ده، هر عالم او داعي کولاى سي چي د همدې ادارې د اعلاميه وسايلو څخه په استفاده کولو په ږغيز او ليکنيز ډول ښکلي اسلامي مطالب او مضامين تر نورو مسلمانانو ورسوي او د امر بالمعروف او نهي عن المنکر د مسئوليت درانه بارونه د همدې لاري څخه هم څه اندازه سپک کړي او د دې تر څنګ د اسلامي دعوت په ښکلي او لوړ آواز نور هم د دعوت په وړاندي شيطاني چلونه شنډ او د اسلامي دعوت چاري نوري هم پياوړي او ګړندئ سي . و بالله التوفيق .
 
ماخذ: تعلیم الاسلام مجله، ۱۰ ګڼه
 
تبصره
يو نوم خامخا وليکئ.دغه نوم تر ٤٠ تورو زيات دى.
برېښناليک خامخا وليکئ.دغه برېښناليک تر ٤٠ تورو زيات دى.دغه برېښناليک باوري نه دى!.
متن خامخا وليکئ.متن تر وروستي بريده رسېدلى دئ.

  که نه لوستل کېږي دلته کليک وکړئ.  

سرته