پوښتنه: ږيره خريل په اسلام کي څه حکم لري؟

د پوښتني کوونکي نوم: فضل محمد 
                            
جواب: ږيره خريل حرامه ده او د ټولو انبياؤ عليهم السلام د تگ لاري څخه مخالفت دى .نبي کریم صلی الله علیه وسلم لس شیان د فطرت د شیانو څخه بللي دي، یعني هغه دا ډول كارونه دي چي د شريعت د حكم څخه علاوه انساني جوړ طبيعت يي هم د كولو تقاضا او غوښتنه کوي په دغو لسو كارونو كي یو د ږیري غټول او بل د بریتونو کوچني کول دي، د آدم علیه السلام څخه نیولې بیا تر محمد رسول الله صلی الله علیه وسلم پوري چي څومره پیغمبران او رسولان عليهم السلام د الله جل جلاله د لوري راغلي دي ټول د سليم فطرت څښتنان وه هغوى ږیري لرلې...

او ددې د پاره موږ قرآني آیت هم ثبوت لرو، کله چي موسی علیه السلام د طور غره ته تللی ؤ او د الله جل جلاله لخوا څخه تورات ورکول سو، دده قوم د ګېلګي عبادت شروع کړ او دده ورور هارون علیه السلام هغوی منع کول خو هغو د هارون علیه السلام په قول نه کول، کله چي موسی علیه السلام د طور د غره له خوا را ستون سو په خپلو سترگو یې ولیدل چي دده قوم د ګیلګي عبادت شروع کړی دی د ډیر درد او غضب څخه يي  خپل ورور هارون علیه السلام  تر سر او ږیره ونیوه الله يي حكايت داسي كوي: قَالَ يَا ابْنَ أُمَّ لَا تَأْخُذْ بِلِحْيَتِي وَلَا بِرَأْسِي .. ۹۴ طه ژباړه : هارون عليه السلام موسي ته وويل : اې زما د مور زویه ! ما تر سر او ږیره مه نیسه.

 د ږيرو خريل د مشركانو عادت ؤ نو ځكه نبي علیه السلام د هغوى څخه په دې عمل كي د مخالفت كولو حکم کړی دی :امام بخاري د ابن عمر څخه روايت كوي : عَنْ ابْنِ عُمَرعَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : خَالِفُوا الْمُشْرِكِينَ وَفِّرُوا اللِّحَى وَأَحْفُوا الشَّوَارِبَ .ژباړۀ : تاسو د مشرکانو څخه مخالفت کوﺉ ږيري مو غټوئ او بريتونه مو كوچني كوئ. د مؤمنانو د پاره په كار ده چي په رسول الله صلی الله علیه وسلم او هم نورو انبياؤ پسي اقتداء وكړي  الله جل جلا له فرمایي: لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ... (الآیة) ژباړه : حقيقتا ستاسو د پاره په نبي (محمد علیه السلام) کي ډیر ښه د اقتدا وړ صفات دي، د  رسول الله صلی الله علیه وسلم هر صفت د اقتدا وړ دی او مؤمنان باید په هغه پسي اقتدا وکړي، ږیره پريښول د انبیاؤ علیهم السلام مسنونه طریقه ده بلکي واجبي حکم دی چي هر مسلمان باید ږیره پریږدي او بریتونه کوچني کړي.

د تعلیم الاسلام مجلې د لومړی ګڼې څخه