لیکنه: مولوي محمد اکبر/  تعلیم الاسلام ویب پاڼه 

اسان فقهي اصطلاحات 
(لسمه برخه) 
(ص)

صابي: دصاحبینو په اند هغه چاته ویل کېږي، چي دټولو ادیانو څخه واوړي، دالله جل جلاله سره شریک نسي دملائکو او ستورو عبادت کوي.

صاحبین: امام ابویوسف او امام محمد رحمهما الله.

صاحب ترتیب: هغه چا ته ویل کېږي چي دبلوغ وروسته شپږ لمنځونه پرې باندي نه وي.

صاع: یوه خاصه پيمانه چي پنځه پوره عرقي سیره او دیوه سیر درېیمه کي کېږي او داوسني ګرام په لحاظ درې کیلو ګرام، ۱۴۹ګرامه او ۲۸۰ملي ګرامه کېږي.

صبح صادق: دشپې دختمیدو سره سم په افق کي په بره خپرې سوي رڼا ته وایي تر دې وروسته رڼا ډېرېږي او تردې وروسته دسهار وخت شروع کېږي.

صحابي: چي نبي کریم صلي الله علیه وسلم ئې دایمان په حالت کي لیدلی وي او پر همدې ایمان مړ سوی وي.

صحیح: هغه عبادت یا معامله چي د ارکانو او شرائطو په مرعاتولو سره پای ته ورسېږی.

صداق: مهر یا ولور.

صدقة: هغه ورکړه اوعطاء چي دالله جل جلاله څخه د اجر او ثواب امید ولري.

صدقة الفطر: سرسایه، هغه صدقه چي دکوچني اختر په سهار واجبیږي.

صَرف: دا دبیع یو خاص ډول دئ، چي د پيسو په مقابل کي پيسې ورکول کېږی لکه: دسرو زرو په مقابل کي سره زر، دسپینو زرو په مقابل کي سپین زر او یا هم دیوې سکې په بدل کي دوهم سکه.

صغیر: کوچني یا نابالغ.

صلوة: لمونځ، په خاصو شرطونو سره خاص افعال او کارونه ترسره کول.

صلوة الاستخارة: هغه لمونځ چي په دوو اړخونو کي دخیر اړخ دالله جل جلاله لخوا غوره کولو له پاره لمونځ.

صلوة الاستسقاء: هغه دوه رکعته لمونځ چي د باران غوښتلو له پاره کېږي.

صلوة الاشراق: دلمر راختلو ۱۵ دقیقې وروسته لمونځ ته داشراق لمونځ وايي.

صلوة الاوابین: دماښام دلمانځه وروسته شپږ رکعته لمونځ په یوه یا دوو یا درو سلامو سره ادا کول.

صلوة التراویح: په روژه کي دفرضو اوسنتو وروسته ۲۰ رکعته لمونځ کولو ته تراوېح وايي.

صلوة التسبیح: په یوه سلام سره څلور رکعته داسي لمونځ چي په هر رکعت کي ۷۵ واري دا تسبیح ویل کېږی: سبحان الله والحمدلله ولا اله الاالله والله اکبر.

صلوة التوبة: دګناه پر کولو باندي دوه رکعته دتوبې په نیت کول.

صلوة الجنازة: د مړي دجنازې لمونځ.

صلوة الحاجة: دالله جل جلاله څخه دیوې اړتیا دپوره کولو په نیت دعا کول.

صلوة الخوف: د دوښمن او نورو په وجه په ځانګړې توګه لمونځ ادا کولو ته دویري لمونځ وایي.

الصلوة الوسطی: دماځیګر لمونځ.

صلوة الخسوف: دلمر تندر نیووني له پاره لمونځ کول، دسپوږمۍ تندر نیولو له پاره لمونځ.

صوم: زوژه، دصبح صادق نه تر لمر لوېدو پوري دخوراک، چښاک او جماع څخه ساتلو ته روژه وايي.

صوم الوصال: دوه یا درې ورځي بېله روژه ماته روژه نیول، شپه او ورځ دواړو خواوو خوراک نه کول.

صوم ایام بیض: د میاشتي ۱۵،۱۴،۱۳ورځو رروژه نیولو ته دسپېنو ورځو روژه وايي.

www.taleemulislam.net