لیکنه : مولوي عبدالسلام حنفي/ تعلیم الاسلام ویب پاڼه 

د اولادونو د روزنې مراحل

په اسلامي شریعت کي نجوني او هلکان چي کله د ځوانۍ مرحلې یعني پنځلسو کالو ته ورسیږي، نو په شرعي احکامو مکلف دي، که چیرته په شرعي احکامو کي غفلت کوي، د کورنۍ مسؤل باید پرې تاکید وکړئ، اسلام د ژوند په هره مرحله کي د خپل اولاد د روزني لارښونه کړی ده، بلکي له نطفې څخه نیولې تر جنین،  پیدایښت، ماشومتوب او د ژوند تر پایه یې ځانګړې لارښوني کړي دي. د کورنۍ د جوړښت په شروع کي د ماشوم پلار ته شرعي حکم دئ چي نیکه، صالحه او ښه نسب لرونکې ښځه وټاکي، تر څو په راتلونکي کي ستاسو د اولاد سالمه روزنه وکړي، ځکه  څوک چي د کښت کولو لپاره اراده وکړي؛ نو د هغه لپاره ښه ځمکه انتخاب کړي، تر څو ښه کښت وکړي، همدارنګه د انسانیت د کښت لپاره الله جل جلاله ښځه پیدا کړې ده، ځکه ښځه د انساني نسل د بقا وسیله ده او راتلونکی کورنۍ نظام له همدې ښځي پیلیږي، د کوچنیانو روزنه، پالنه به همدا ښخه کوي، کله چي ماشوم نړۍ ته سترګي پرانیزي، نو اسلام د ماشوم په غوږونو کي د اذان کول مستحب کړي، تر څو د ژوند په شروع کي یې د الله جل جلاله د وحدانیت اواز  بیا تر وفاته په غوږونو کي وي او همداسي نور سنت کارونه د ماشوم د  پیدایښت په خاطر ترسره کول، کله چي ماشوم اوه کلنۍ ته رسیږي، نو بیا د اسلام حکم دئ چي تاسو ورته د لمانځه کولو حکم وکړئ او که تر لس کلنۍ یې په لمانځه کي سستي  کوله بیا یې د ادب په خاطر په لمانځه نه کولو باندي ووهي او په بسترو کي یې له نورو خویندو او وروڼو جدا ویده کړئ، نو د خپلو اولادونو د تربیت همدا لارښوني دي، چي په راتلونکي کي یې د بې لارۍ او انحراف مخه نیول کیږي او د دې ترڅنګ باید د اسلام په لومړنیو مسائلو پوه کړئ، لکه عقیده، ایمان، نیک اخلاق او د نورو حقوق په پام کي نیولو لارښونه ورته وکړئ.

www.taleemulislam.net