لیکنه: بریالی فیضي/ تعلیم الاسلام ویب پاڼه 

افغانستان د ظالمو امپراتوریو هدیره

د ۱۳۵۸ لمریز کال د جدي په شپږمه روسان افغانستان ته راغلل او د نهو کالو له پاره ئې افغانستان اشغال کړ، په ۱۳۶۷ لمریز کال کي بیرته ووتل، افغانانو په ډېره مېړانه د خپلي خاوري او خپل دین دفاع وکړه او اشغالګرو چي دلته هرڅونه د نفاق تخمونه شیندلي وه، هغو څه فایده ونه کړه. 

نن الحمدلله افغانان سرلوړي او د خپل خاوري څښتنان دي. 

افغانانو نه یوازي شوروي بلکي تر هغه وروسته د امریکا په مشرۍ ټلوالي او تر هغه مخکي ئې انګرېزانو ته شرموونکي ماتي ورکړي دي. 

له دې داسي څرګندیږي، چي افغانستان د ظالمو او اشغالګرو امپراتوریو هدیره ده، افغانانو تل په تاریخ کي دا ثابته کړې ده، چي دا خاوره د هیچا تر تسلط لاندي نه پرېږدي او د تاریخ په بېلابېلو دورو کي ئې د خپلي خاوري څخه د مال او سر په بیه دفاع کړې ده. 

یوازي په معاصر تاریخ کي افغانستان د وخت درو امپراتوریو ته سختي ماتي ورکړي دي، د خپلواکۍ دا درې ورځي او د افغانانو شهامت به په تاریخ کي تل ثبت وي. 

مجاهدو افغانانو په خورا لوړ عزم په ډېرو کمو امکاناتو او تجهیزاتو د شوروي اتحاد د اشغال پر ضد مبارزه پیل کړه، وروسته له ډېرو قربانیو وتوانېدل، چي د شوروي اتحاد یرغل ته د پای ټکی کښېږدي، چي په دې کار سره يې نه یوازي افغانستان آزاد کړ، بلکي د افغانانو د جهاد برکت و، چي شوروی اتحاد پر ګونډو سو، په نړۍ کي ئې خپل ګټلی نوم بایلود، نړۍوالو ته وشرمېد او امپراتوري ئې ونړېده، چي په دې سره د سیمي یو شمېر مسلمان هیوادونه لکه تاجکستان، ترکمنستان، ازبکستان او نور هم د شوروي له تسلط څخه خلاص سول.

د جنګ په میدان کي تل بهرنیو اشغالګرو له افغانانو څخه ماتي خوړلي دي، اوس نړۍ هم په دې پوه سوې، چي افغانستان کي د دوی اشغال هیڅکله کامیابېدای نه سي. 

تر شوروي اتحاد را وروسته امریکا او متحدین ئې بېله دې چي د افغانستان تاریخ په یاد راوړي، پر افغانستان ئې یرغل وکړ، د وخت حکومت ئې ړنګ کړ، خو دا دئ، نن ورځ اسلامي امارت د الله پاک په مرسته او د مجاهدو او مېړنیو افغانانو د سرښندني په نتیجه کي یو ځل بیا پر دې خاوره حاکم سوی دئ او د امریکا او متحدینو یرغل ئې پر دې سپېڅلې خاوره پای ته رسولی دئ. 

نن ورځ افغانستان د نړۍ پر مخ سرلوړی او د خپلي خاوري څښتن سوی، په افغانستان کي یو سوچه اسلامي نظام حاکم سوی او ملک د اقتصادي اړخه د ځان بسیایني پر لور چټک ګامونه اخلي، په سیمه او نړۍ کي ئې د هیوادونو سره سالمي تجارتي او سیاسي اړیکي رغولي.
نور دي نړۍوال د افغانستان د اشغال خوبونه د تل له پاره له ذهنه وباسي او که ئې احیانا په دې اړه فکر کوئ، نو دي د افغانانو تېر سل کلن او په عموم کي پنځه زره کلن تاریخ ښه سم مطالعه او پر خپله پرېکړه دي له سره غور وکړي.

www.taleemulislam.net