سوال: که څوک د لمانځه څخه دباندي په سجده کي د تسبيح پر ځاى استغفار ووايي جواز لري که يې نه لري؟
د سوال کونکي نوم:ياقوت
جواب: په رکوع او سجده کي د تسبیحاتو ویل سنت دي خو البته د دې په څنګ کي استغفار او دعاوي هم کېدلای سي او د تسبیحاتو څخه علاوه د استغفار او دعاګانو ویل هم د رسول الله صلی الله علیه وسلم څخه رانقل سوي دي : عُقْبَةَ بْنِ عَامِرٍ رضي الله عنه وایي : څه وخت چي دا ایت { فَسَبِّحْ بِاسْمِ رَبِّكَ الْعَظِيمِ } نازل سو.نو رَسُولُ اللَّهِ صلی الله علیه وسلم وفرمایل : اجْعَلُوهَا فِي رُكُوعِكُمْ .يعني سبحان ربي العظيم په رکوع کي وایاست .
او څه مهال چي دا ایت { سَبِّحْ اسْمَ رَبِّكَ الْأَعْلَى } نازل سو رسول الله صلی الله علیه وسلم وفرمایل :اجْعَلُوهَا فِي سُجُودِكُمْ (ابوداود ) سبحان ربي الاعلي په سجده کی وایاست .همدا راز أَبِو هُرَيْرَةَ رضي الله عنه وایي : رَسُول اللَّهِ صلی الله علیه وسلم به په سجده کي دا استغفار وايه : اللَّهُمَّ اغْفِرْ لِي ذَنْبِي كُلَّهُ دِقَّهُ وَجِلَّهُ وَأَوَّلَهُ وَآخِرَهُ وَعَلَانِيَتَهُ وَسِرَّهُ (مسلم )ژباړه : یا الله ! زما ټوله ګناه وړه وي که لویه ، اوله وي که آخره ، ښکاره وي که پټه راته وبخښه .او بل داچي أَبِو هُرَيْرَةَ رضي الله عنه وایي: رَسُول اللَّهِ صلی الله علیه وسلم فرمایلي دي : أَقْرَبُ مَا يَكُونُ الْعَبْدُ مِنْ رَبِّهِ وَهُوَ سَاجِدٌ فَأَكْثِرُوا الدُّعَاءَ (مسلم ) بنده خپل رب ته تر بل هر وخت په سجده کي نژدې وي نو تاسو په سجده کي دعاوي زیاتي کوئ . لهذا په سجده کي پر تسبیحاتو برسیره استغفار او دعاوي ويل کېږي او په کار ده ،چي وسي البته دا ټول په انفرادي لمانځه کي ځکه د جماعت لمونځ باید د مقتدیانو د حال سره سم ورکول سي . د یادوني وړ ده، چي د لمانځه څخه دباندي، چي سجده کول جواز لري هغه یا د تلاوت سجده ده او یا د شکر سجده ده د دې څخه علاوه ،چي ځيني کسان د مناجات سجده کوي هغه مشروعیت نه لري د سجدو اړوند تفصیلي معلومات په نورو سوالونو کی کیدلای سي ،چي جواب سي .
د تعلیم الاسلام مجلې د دريمي ګڼې څخه
