لیکنه: عبدالرحیم راشد / تعلیم الاسلام ویب پاڼه 

تکبیرات تشریق له لاندنیو کلماتو څخه عبارت دي : 

« اَللَّهُ أَكْبَرُ، اَللَّهُ أَكْبَرُ، لَا إِلَهَ إِلَّا اللَّهُ وَاللَّهُ أَكْبَرُ، اَللَّهُ أَكْبَرُ، لِلَّهِ وَالْحَمْدُ »

۱مسئله : د تکبیرات تشریق د پيل وخت: نوموړي تکبیرونه په مفتيْ  بِهِ مذهب باندي د درویشتو (۲۳) لمونځونو وروسته ویل کیږي ، چي پیل يې د عرفات د ورځي دسهار د لمانځه  وروسته دی،  بیا دلوی اختر د څلورمي ورځي تر مازدیګر پوري ویل کیږي ، چي ټول درویشت لمونځونه کیږي .

۲مسئله : دتکبیرات تشریق  د ویلو شرطونه او حکم : دا تکبیرونه  په  یاد  سوو ورځو کښې د هر فرضي لمانځه وروسته  دستي ( بېله ځنډه ) په هر بالغ  نارینه ، ښځي  ، مقیم ، مسافر ،د ښار او صحرا په خلکو،  منفر د(یوازي لمونځ کوونکي ) او په جماعت سره لمونځ کوونکي باندي  یو (۱) ځل ویل يې واجب او درې (۳) ځله ویل  يې مستحب دی. 

۳مسئله : نارینه به دا تکبیرونه په لوړ آواز سره وایي  او ښځي به دا تکبیرونه په کښته آواز سره وايي ، ځکه د ښځي آواز عورت دی . 
یادونه : دا تکبیرونه په  میانه لوړ آواز باندي ویل يې ضروري دي  ډېر خلک په دې کښې غفلت کوي ، یا يې نه وايي او یا يې په ډېر کښته آواز سره وايي .

۴مسئله : د لوی اختر د لمانځه وروسته که دا تکبیرونه  ووایي هیڅ پروا نه لري ځکه د اختر لمونځ هم په جماعت سره دا د جمعې د لمانځه په ډول سو ( د جمعې د لمانځه وروسته دا تکبیرونه ویل کیږي ) او بل  د اختر په ورځ زیات خلک را جمعه سوي وي، نو تکبیرونه به وايي .

۵مسئله : که د امام څخه تکبیرات هېر سول په مقتدي باندي دا واجب دی چي تکبیرات به وايي.

۶مسئله : مسبوق ( هغه کس چي په امام پسې اقتداء وکړي خو  یو څو رکعته ور څخه تیر سوي وي ) دغه مسبوق کله چي خپل لمونځ یې پوره کړل نو بیا به یواځي تکبیرات تشریق  وایي .

۷مسئله : که د چا څخه  تکبیرونه هېر سول  او په همدې حالت کښې د مسجد څخه وتلی وي یا يې په قصدیا هېره سره خبري وکړې یا په قصد سره بې اودسه سو تکبیرونه ورڅخه ساقط سول ، البته که چیري په خپل ځای ناست ؤ، نو یواځي په ځنډ سره تکبیرونه نه ساقطیږي ، ویل يې پرې ضروري دي .

۸مسئله : که د تشریق  په ورځو کښې  د چا څخه لمونځ هېر سي  نو که ددغه کال د تشریق په ورځو کښې ور پیاد سي ، نو د لمانځه  قضآء به راوړي او تکبیرات تشریق به هم وايي . 

۹مسئله : او که يې د تشریق په ورځو کښې د لمانځه قضأء را نه وړه ، یا يې د مخکني کال د تشریق د ورځو د لمانځه قضأء  يې د بل کال د تشریق په ورځو کښې راوړه، نو تکبیرونه ساقط سول بیا به يې نه وايي .

۱۰مسئله : که د چا څخه د تشریق له ورځو مخکښې لمونځ قضأء سوي وي او د تشریق په ورځو کښې يې قضأء راوړي نود تشریق  تکبیرونه به نه وايي . 

(الدرالمختار ج:۱ص: ۱۱۴کتاب الصلاة ، باب العیدین  ، الردالمحتار ج: ۳ص: ۶۱ـــ۶۶،عالمګیري  ج:۱ص:۱۵۲،قول الراجح   ج :۱ص:  ۱۵۰ــ۱۵۲، فتاوای حقانیه ج:۳ص:۱۳۹ـــ۱۴۱،أحسن الفتاوای ج:۳ص:۳۹۵ او۴۰۰، فتاوای فریدیه ج: ۳،ص:۲۰۸ــ۲۱۰،).

www.taleemulislam.net