لیکنه: مولوي نورالحق مظهري/ تعلیم الاسلام ویب پاڼه
وخت ګټور او فرصت غنيمت وګڼئ
که د خپل هدف او آرمان پر اساس د ژوند ټولي واقعي او احتمالي اړتياوي وپېژنو او په اړه يې کافي معلومات حاصل کړو يقينا چي هيڅوخت به د علمي او معلوماتي فقر سره مخامخ نه سو په خاصه توګه د ځوانۍ او سپين ږيرتوب په حالت کي چي د انسان د غرور، غفلت او ناتوانۍ زمانه ده.
ډېری انسانان داسي وي چي د ځوانۍ مخکي يې د ځوانۍ د وخت اړتياوي نه وي پېژندلي او آمادګي يې نه وي ورته نيولې ځکه نو د ځوانۍ د راتګ سره د ستونزو سره مخامخ کيږي او يا يې د ځوانۍ ارزښتناکه وخت په غفلت او ايله سرۍ کي تېر کړی وي او د خپل سين ږيرتوب لپاره يې آمادګي نه وي نيولې ځکه نو د سپين ږيرتوب د راتګ سره د ناپوهۍ او ناخبرۍ په درياب کي غرق سي او د خپل ژووند لومړنۍ اړتياوي نسي زده کولای.
د ژوند هره لحظه قيمتي او غنيمت وګڼئ او هيڅ وخت د زده کړي او پوهي څخه ځانونه مستغني مه بولئ ځکه د لاس څخه وتلی فرصت بيا په لاس نه راځي او تېر سوی وخت بيا نه راګرځي.
