لیکنه: نعمت الله شاکر/ تعلیم الاسلام ویب پاڼه 

په انساني تاريخ کي درې ځيرک انسانان 

عبد الله بن مسعود رضي الله عنه فرمايي: په انساني تاريخ کي زيات ځيرک انسانان درې دي. 

 
۱- عزيز مصر زيات ځيرک وو: کله چي عزيز مصر يوسف عليه السلام له قافلې څخه رانیوی او کور ته ئې راوستی، نو خپلي ميرمني(زليخا) ته ئې وويل: أَكْرِمِي مَثْواهُ عَسَى أَنْ يَنفَعَنَا أَوْ نَتَّخِذَهُ وَلَداً(سورة يوسف -۲۱)

د ده د اوسيدلو د ځای اکرام کوه، يعني دی په ښه شان وساته، ممکن د ده موږ ته نفع ورسيږي يا به ئې په زويولۍ ونيسو.

څونه ستر پيغام لرونکی کلام دی، د ده موجود موقف ته ئې نه وکتل، بلکي په يوسف عليه السلام کي موجود استعدادونه ئې د هغه په څېره کي محسوس کړي وو.

 ۲ - د شعيب عليه السلام هغه لور زياته ځيرکه وه، چي پلار ته ئې د موسی عليه السلام اړوند وويل: يا أَبَتِ اسْتَأْجِرْهُ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ(القصص-۲۶).

اې پلارجانه! دغه کس په مزدورۍ ونيسه؛ ځکه په هغو کسانو کي چي ته ئې په مزدوري نيسې خير او افضل هغه دی چي هغه قوي او امين وي.

يو ئې د موسی عليه السلام د استئجار او استخدام وړانديز وکړ، بل ئې د بشري استخدام اساسي معيارونه وروښوول، يعني په موسی عليه السلام کي دغه صفتونه سته.

رښتيا هم دغه عظيم صفات په هغه کي موجود وه.

او د استخدام لپاره دغه دوه اساسي شرطونه هم دي، چي يو قوت( تخصص) او بل امانت( تعهد) دی.

۳- أبو بكر الصديق زيات ځيرک وو، چي د وفات پر وخت ئې عمر بن الخطاب رضي الله عنه د مسلمانانو د خليفه په توګه پيشنهاد او تعين کړ.
د رسول الله څخه ماسيوا د اسلامي تاريخ تر ټولو زرينه دوره د حضرت عمر رضي الله عنه وه، چي اسلامي امت د هره اړخه د برم او پرمختګونو څخه برخمن وو.

الباب السابع من قصص الأنبياء لابن كثير 

www.taleemulislam.net