لیکنه: ویس احمد ابراهيم / تعلیم الاسلام ویب پاڼه

د سورة الروم لنډه پېژندنه  

سورة الروم د مصحف او تلاوت په اعتبار ۳۰ سورة دئ چي د ۶۱۵ ميلادي کال څخه تر ۶۱۷ ميلادي کاله په موده کي نازل سوی دئ. مکي سورة دئ يعني د هجرت څخه د مخه نازل سوی دئ.

سورة الروم ۶۰ آية دئ او ۶ رکوع لري.

د دې مبارک سورة نوم د دوهم آية کريمې (غُلِبَتِ الرُّومُ) څخه اخستل سوی دئ، يعني: د روم خلګ (يا د روم امپراطوري) مغلوبه سوه.

روم ته په انګليسي ژبه کي Byzantines ويل کيږي. د روم امپراطورۍ د اروپا جنوبي حصې، ترکيه، شمالي حصه د شام او بعضي د شمالي افريقا برخي ئې په واک کي درلودې.

کله چي رسول اکرم صلی الله علیه وسلم په مکة معظمة کي وو، الله تعالی وحي ور ته وکړه چي روميان به د فارس د امپراطورۍ په واسطه مغلوبه کيږي او دا همهغه کال وو چي نبي کريم صلی الله علیه وسلم مسلمانانو ته د هجرت اجازه ورکړه چي حبشې ته ولاړ سي.

په سورة الروم کي لاندي موضوعات ذکر سوي دي

۱-  الله تعالی هيڅ کله خپل د وعدې مخالفت نه کوي.

۲-  په مځکه کي وګرځئ او تر تاسو د مخه قومونه ډېر قوي وه، ليکن خپل د کفر له کبله هلاک سول.

۳-  د قيامت د ورځي بيان، مؤمينانو ته ښه بدله ورکول او کفارو ته د جهنم عذاب.

۴-  د الله (عزوجل) ربوبيت.

۵-  هغه کسان کاميابه دي چي خپلو قريبانو ته د دوی حق ورکوي او هم و مسکينانو او مسافرو ته.

۶-  په وچه او په بحر کي د فساد د خپرېدو لامل خپله انسان دئ.

۷-  الله (عزوجل) هغه ذات دئ چي انسان ئې کمزوره پيدا کئ، بيا ئې قوت او زور ورکئ، وروسته ئې بيرته کمزوره کوي او سپين ږيری (يعني ضعيفه) کوي ئې.

www.taleemulislam.net