د (احکام) نورې ليکنې
تازه سرليکونه
بېلابېلې ليکنې
د لمانځه سره محبت !
را لېږونکی: نعمت الله"علمي"
ابواسحاق سبیعي رحمة الله علیه یو مشهورمحدث دی. نوموړی د تقريباً سلو کلونو په عمر وفات سوی دی. د ژوند په آخره کي يې افسوس کاوه، چي د سپین ږيريوالي په سبب مي د لمانځه خوند ولاړی؛ اوس په لمانځه کي یوازي البقره او آل عمران سورتونه لوستلای سم؛ زیات نه سم لوستلای. که څه هم ذکر سوي دوه سورتونه پاو کم څلورسېپارې کېږي، خو په هغه خلکو کي د دين جذبه او د لمانځه سره محبت دومره و، چي دغه ستر سورتونه يې لوستلای سوای بيا يې هم ځان ملامتاوه.
د حضرت مجدد الف ثاني رحمة الله علیه له نامه سره ممکن ځيني خلګ آشنا وي. د هغه یو خلیفه مولانا عبدالواحد لاهوري یوه ورځ وویل: آیا په جنت کي به لمونځ نه وي؟ یو چا ورته وویل، چي په جنت کي خو لمونځ نه وي؛ ځکه هغه خو د عملونو د عوض ځای دی؛ نه د عمل کولو ځای. ده له خولې څخه آه وایستی او د ژړا په حال کي يې وویل: په جنت کي بې لمانځه څنګه ګذاره کېږي؟!
په داسي خلکو دنیا ودانه ده او په اصل کي د ژوند خوند اخیستونکي هم دغه خلګ دي. الله جل جلاله دي د داسي مبارکوانسانانو په برکت پر موږ رحم وکړي.
حافظ ابن قیم رحمة الله علیه په زاد المعاد کي لیکي:
- لمونځ رزق ډېروي؛
- صحت ساتي
- مرضونه لېري کوي؛
- زړه ته قوت او روښنايي ورکوي؛
- مخ ښایسته او روښانه کوي؛
- بدن ته خوشحالي ورکوي؛
- په غړو کي تازه ګي پیداکوي؛
- سستي لېري کوي؛
- د سینې د پراخوالي سبب ګرځي؛
- د روح خوراک دی؛
- د الله جل جلاله د نعمتونو ساتونکی دی؛
- د الله جل جلاله له عذاب څخه د ساتلو سبب دی؛
- شیطان لېري کوي او د رحمان ذات سره د نږدېوالي سبب دی.
لنډه دا چي د روح او بدن په حفاظت کي لمونځ زیاته اغېزه لري او د دواړو ساتنه کوي. همدا ډول د دواړوجهانونو د ګټو په لاس ته راوړلو او د دواړو جهانونو د تاوانونو څخه په ساتنه کي زیات اثرات لري. «فضائل اعمال»
(حلاله نفقه د لمانځه پر خوند ډېره اغېزه لري.)
ماخذ: تعلیم الاسلام مجله، ۱۵ ګڼه
ورته ليکنې:
تبصره
