لیکنه: انجینر محمد اسلم اسلم/ تعلیم الاسلام ویب پاڼه

 
د مور او پلار نافرماني کبيره ګناه ده

له حضرت عبد الله بن عمرو رضی الله عنه څخه روايت دی چي رسول الله صلی الله عليه وسلم وفرمايل : لوی لوی ګناهونه دا دي:

۱ : له الله تعالی جل جلاله سره شرک کول.

۲ :  د مور او پلار نافرماني کول.

۳ :  د کوم نفس وژنه، چي وژل يې شرعاً قاتل ته حلال نه وي.

۴ :  په درواغو قسم خوړل (مشکوة المصابيح، ص : ۱۷، رواه البخاري). 

د کبيره ګناهونو فهرست ډير اوږد دئ، په همدغه حديث کي د هغو ګناهونو ذکر شوی کوم چي ډير لوی دي، په دې کي له شرک وروسته عقوق الوالدينو ذکر شوی، د عقوق په لفظ کي ډير عموم دی، مور او پلار ته تکليف رسول، په قول يا فعل سره ورته ضرر رسول، نافرماني ئې کول، د اړتيا په وخت کي په هغو مصرف نه کول دا ټول په عقوق کي داخل دي.

ځينو علماوو د عاق تشريح داسي کړې، چي د عاق لفظ درې حروف لري، يو عين، بل الف او دريم قاف، د عين معنی ده د مور او پلار غيبت کول، د الف معنی ده؛ د مور او پلار اهانت کول او د قاف معنی ده مور او پلار ته په قهر کېدل، هر څوک چي دا درې کارونه وکړي هغه په عاق کي داخل دئ.

د الله تعالی جل جلاله په نزد چي کوم محبوب ترين اعمال دي په هغو کي په خپل وخت له لمانځه کولو وروسته له مور او پلار سره د غوره چلند کولو درجه ښودل شوې، بالکل په همدې ډول د سترو سترو کبيره ګناهونو په فهرست کي له شرک وروسته د مور او پلار ازارول او د هغو نافرماني کول شماره شوي (حقوق الوالدين، ص : ۳۷). 

www.taleemulislam.net