د ذی الحجې ( لوی اختر ) د میاشتې د لومړنیو لسو ورځو فضیلت

ژباړه او راټولونه: عبدالرحیم راشد / تعلیم الاسلام ویب پاڼه

په دې لسو ورځو کښې د نېکو اعمالو فضیلت:

۱ـــ  عبدالله ابن عباس رضي الله عنهما  روایت کوي ،چي رسول الله صلي الله علیه وسلم وفرمایل : الله  جل جلا له  ته د لوی اختر د لومړنیو لسو ورځو څخه پرته په نورو  ورځو کښې نېک اعمال دومره قدر نه لري لکه په دغو ورځو کښې چي ورته محبوب ( خوښ ) دي . اصحابو کرامو  وپوښتل ، چي ای د الله رسوله  صلي الله علیه وسلم ! د نورو ورځو جهاد في سبیل الله هم  الله عزوجل ته دومره محبوب ( خوښ ) نه دی؟ رسول الله  صلي الله علیه وسلم ورته وفرمایل : هو ، هغه هم مګر دا چي سړی له خپل ځان او مال سره د جهاد میدان ته راووزي او بیا هلته هرڅه قربان کړي او بېرته  ستون نه سي( شهید کړل سي ). ( رواه : بخاري، أبوداؤد، ترمذي ، ابن ماجه ،أحمد،و  دارمي ).

۲ــ  یو بل حدیث کي رسول الله صلي الله علیه وسلم فرمایي : الله  جل جلا له     ته د لوی اختر د میاشتي د لومړنیو ورځو په پرتله د هیڅ ورځو عبادت  دومره خوښ نه دی،   د دغه ورځو یوه روژه د یوه کال  د روژو ثواب لري او شپه رڼول يې د قدر د شپې ثواب لري.( رواه : ترمذي و ابن ماجه ).

۳ـــ  سعید بن جبیر د عبدالله ابن عباس  رضي الله عنهما  څخه روایت کوي ، چي رسول الله صلي الله علیه وسلم وفرمایل : الله  جل جلا له  ته تر ټولو غوره ورځي اوپه کومو ورځو کښې چي  نېک اعمال  ورته خوښ دي هغه د لوی اخترلومړنۍ  لس ورځي دي  ، نو په د دغه ورځو کښې تهلیل ( لا اله الا الله) ، تکبیر( الله اکبر)  او د الله تعالی ذکر زیات کوئ او د یوې ورځي روژه یې د یوه کال د روژې  سره برابره ده او د نېکو  اعمالو ثواب  اووه سوه( ۷۰۰ )چنده اضافه کیږي .( الترغیب والترهیب ).

په دې لسو ورځو کښې د روژې نیولو فضیلت :

۴ــ حضرت انس رضي الله عنه   فرمایلي  دي: د لوی اختر د میاشتي د لومړنیو لسو ورځو روژه دومره ثواب لري ، چي هر ورځ یې د زرو ورځو یا یوه کل سره په ثواب کښې برابره ده  او د عرفات ورځ يې د لسو زرو ورځویا لس کلونو  سره په ثواب  کښې برابره ده. (رواه : البیهقي ، الأ صبهاني  ، نزهة المجالس ،ص:۱۷۵).

په دې لسو ورځو کښې له ګناه څخه دځان ساتلوفضیلت :

۵ــ حضرت فضل بن عباس  رضي الله عنهما  د رسول الله صلي الله علیه وسلم څخه روایت کوي : څوک چي د عرفات په ورځ  خپله ژبه ، سترګي او غوږونه  له ګناه څخه وساتي الله جل جلا له   به تر راتلونکي عرفات پوري بخښنه ورته وکړي . (نزهة المجالس ،ص:۱۷۶).
۶ـ أبو قتاده رضي الله عنه    روایت کوي ، چي رسول الله صلي الله علیه وسلم وفرمایل : د عرفات د ورځي روژه زه داسي بولم چي د سړي د یو راتلونکي  او  تیر کال ګناهونه  رژوي .

( رواه: ترمذي ص:۱ج: ۹۳).

www.taleemulislam.net