په وظيفه کي معاش خپل هدف مه ګرځوه
لیکنه: مولوي نورالحق مظهري/ تعلیم الاسلام ویب پاڼه
دا حقيقت دئ چي معاش او اجرت د انسان اړتيا او ضرورت دی او بېله معاشه کار هم نسي کېدلای خو په وظيفه کي معاش د ځان هدف او مقصود مه ګرځوه؛ بلکي هدف د الله تعالی رضايت او د خپلو خلګو او نظام خدمت وګرځوه؛ تر څو دي الله تعالی په کار کي برکت هم واچوي او په آرام زړه خپل کار هم پر مخ باندي بوزې.
دا په تجربه ثابته سوېده چي د معاش لپاره وظيفه کول ددې تر څنګ چي برکت به ونلري انسان به په وظيفه کي د برياليتوب څخه هم محروم وي او د يو ډول غفلت او ټنبلۍ سره به مخامخ کيږي؛ ځکه دده ټول فکر به د معاش لپاره وي چي څنګه يې ډېر کړي او يا يې څنګه ثابت وساتي؟ چي طبعا په داسي حالت کي د کار معنويات او په کار کي للهيت له منځه ځي او د مادياتو په محبت کي انسان غوټه کيږي.
د مادياتو په محبت کي غوټه کېدل په هر مسئوليت کي د انسان د ناکامۍ لپاره لوی سبب دئ، ځکه د همدغه محبت له کبله انسان رشوت اخلي، په هر ډول چي وي د خپل معاش ډېرولو هڅي او کوښښونه کوي، د زياتو پيسو لاس ته راوړلو لپاره فساد او درغلۍ ته مخه کوي آن تر دې چي په خپل ټاکل سوي معاش باندي قناعت نه کوي ځکه نو ممکن د خپلي رسمي وظيفې سره سره بله وظيفه هم وکړي او يا هم د خپلي وظيفې د محدوديت څخه بهر د امتيازاتو لپاره کوښښ وکړي چي په نتيجه کي په خپله رسمي وظيفه کي د غفلت سره او بيا د ناکامۍ سره مخامخ کيږي.
د مسلمان لپاره په هر کار کي د نيت اخلاص ډېر مهم دی، که په مباح کار کي مسلمان خپل نيت سم کړي ارومرو به الله تعالی پر هغه باندي ثواب ورکوي له همدې امله زبيد يامي رحمه الله فرمايي: زه خوښ لرم چي په هر شي کي نيت ولرم، آن تر دې چي د ډوډۍ په خوړلو او اوبو څښلو کي هم نيت ولرم.
وعن زُبَيدٍ اليامي، قال: إنِّي لأحبُّ أن تكونَ لي نيَّةٌ في كلِّ شيءٍ، حتى في الطَّعام والشَّراب.[جامع العلوم والحکم]
دا معلومه خبره ده چي په نظام کي وظيفه کول د هيواد، نظام او خلګو په خير باندي تماميږي نو که څوک خپل نيت د الله لپاره کړي ددې تر څنګ چي الله تعالی به يې په وظيفه کي مرسته کوي او برکت به يې په برخه کوي په وظيفه کي به برياليتوب هم ورته په نصيب کړي او معاش خو بېله هغه ورته ورکول کيږي نو ډېره ښه خبره دا ده چي انسان په ښه نيت باندي خدمت وکړي.
