لیکنه: انجینر محمد اسلم اسلم/ تعلیم الاسلام ویب پاڼه

د قران په ایتونو کي د والدینو ذکر

الله تعالى د عظيم الشان قران په دولسو مبارکو ايتونو کي د مور او پلار د عزت، خدمت، درناوي او ادب کولو په هکله امر او لارښودني کړي دي.

د توحيد او عبادت سره يوځاى د موراوپلار سره د احسان کولو امر

الله تعالى د پاک قران په څلورو مبارکو  ايتونو  کي د خپل توحيد او عبادت د امر سره يو ځاى د مور او  پلار سره د احسان کولو امر هم فرمايلي دئ، چي د هغو د جملې څخه يو يې دغه مبارک ايت دئ.

وَاعْبُدُوا اللَّهَ وَلَا تُشْرِكُوا بِهِ شَيْئًا وَبِالْوَالِدَيْنِ إِحْسَانًا.

او د الله تعالى عبادت وکړئ او د هغه سره هيڅ شى مه شريکوئ او د خپل مور او پلار سره نيکي وکړئ.

د مور او پلار څخه د شکر کولو امر

الله تعالى په لاندني مباک ايت کي د خپلو نعمتونو په  مقابل کي د  شکرکولو د امرسره يو ځاى د موراو پلار څخه د شکر کولو امرهم کړی فرمايلي يې دي .

أَنِ اشْكُرْ لِي وَلِوَالِدَيْكَ إِلَيَّ الْمَصِيرُ.

انسان ته مو وصيت کړی، په دې چي ماته او خپل مور او پلارته شکر وکړه [ستاسو]بيرته راتګ ماته دی.

پر جهاد باندي د مور او پلار د خدمت او  نيکۍ لومړيتوب

که څه هم د الله تعالى په لار کي جهاد کول د اسلام د سپيڅلي دين د ډېرو مهمو احکامو څخه دئ خو تر څو چي د عيني فرضيت مرتبې ته نه وي رسېدلى د مور او پلار خدمت کول پرې د لومړيتوب حق لري لکه چي حضرت عبدالله بن مسعود رضی الله عنه فرمایي:

سئلت النبي صلی الله علیه وسلم  اي العمل احب الى الله تعالى ؟قال الصلواة على وقتهاقلت ثم اى ؟قال برالوالدين قلت ثم اي ؟قال الجهاد فى سبيل الله.

د پيغمبرصلی الله علیه وسلم  څخه مې پوښتنه وکړه چي کوم عمل الله تعالى ته ډېر ګران دی؟ وې فرمايل: په خپل وخت لمونځ. ما وويل چي بيا کوم عمل ؟وې فرمايل د مور او پلارسره نيکي کول. ماوويل: چي بيا کوم عمل [ورته ډېرګران دی؟] وې فرمايل: د الله تعالى په لار کي جهاد. 
همدغه راز يوسړي د الله تعالى د سپيڅلي استازي څخه د جهاد د کولو هدايت وغوښت هغه ورته په ځواب کي وفرمايل :الک ابوان ؟ قال نعم قال ففيهمافجاهد.

ايا ته مور او پلار لري؟هغه سړي وويل: هو! ورته وي فرمايل ته يوازي د همدوی خدمت د جهاد فريضه پرځاى کړه د خپل مور او پلار خدمت وکړه ستا لپاه همدا يو مهم  جهاد دی.

www.taleemulislam.net