لیکنه: مولوي نورالحق مظهري/ تعلیم الاسلام ویب پاڼه
د مفسدينو او مجرمينو مخه به څنګه نيسو؟
يو د ګټو او وظايفو څخه د اسلامي نظام دا دی چي د الله تعالی په مځکه کي عدل قائم کړي او د هر ډول فساد مخه ونيسي هغه چي په هره ذريعه او هره لاره کيږي؛ يوه ډله د مجرمينو هغه کسان دي چي په مځکه کي فساد کوي چي زموږ د فقهي په ډېرو کتابونو کي يې په مثال کي هغه کسان ياديږي چي پر مسلمانانو لاره بندوي او مسلمان لوټوي يا يې وژني، د داسي کسانو لپاره شريعت د مجازات په توګه وژل، د لاس او پښې پرېکول او حبس کول ټاکلي دي.
د فقهي په ځينو کتابونو کي يې ځيني نور کسان هم ذکر کړي دي چي په مځکه کي فساد کوونکي ورته ويل کيدلای سي او د هغو کسانو حکم لري چي پر مسلمانانو په ظلم سره لاره بندوي لکه هغه څوک چي مسلمانان په خپه وژني، لکه هغه څوک چي مسلمان د دې لپاره وژني چي مال يې ورڅخه واخلي او لکه هغه کسان چي په ښارونو کي د وسلې په واسطه پر مسلمانانو زور زياتي کوي يعني مسلمانان په عذابوي. [المحيط البرهاني ج۲ ص۳۳۷]
زما په آند زموږ په زمانه کي هغه کسان چي د خلکو امنيت ګډوډوي او په خلکو کي وحشت خپروي ټول په هغو انسانانو کي داخل دي چي په مځکه کي فساد کوي، لکه هغه کسان چي د مسلمانانو ماشومان تښتوي، لکه هغه کسان چي په بازارونو کي پر مسلمانانو توپانچه او ټوپک راپورته کوي او مالونه يې ورڅخه اخلي او لکه هغه کسان چي د مسلمانانو کورونو ته اوړي او غلاوي ورڅخه کوي.
زما نظر دا دی چي د داسي کسانو سره هيڅ ډول عطوفت نه دی په کار او د دوی سره بايد ډېر سخت چلند وسي تر څو مسلمانان د دوی د شر څخه نجات پيدا کړي، په مسلمانانو کي امن او آرامي خوندي سي او د ټولو مجرمينو لپاره درس او عبرت سي.
زموږ په زمانه کي ډېری مجرمين د مجبوريت او مسکنت له وجهي جرم ته لاس نه اچوي بلکي يا يې دغه مسلک وي او يا يې هم د دې لپاره کوي چي پر خلکو امنيت سره ګډوډ کړي او پر نظام خلک بې باوره کړي؛ زه داسي فکر کوم چي ممکن په داسي جرمونو کي ځيني استخباراتي او مافيايي کړۍ دخالت ولري ځکه دوی په هيواد کي اسلامي نظام او بيا د اسلامي نظام تر سيوري لاندي امينت نسي زغملای له همدې امله خپل نهايتي کوښښ کوي تر څو نظام ضعيف او ناتوانه ښکاره کړي او د خلکو باور ورباندي کم کړي.
که د اسلامي نظامونو په وړاندي د منافقينو دسيسې مطالعه کړو دا به له ورايه راته ثابته سي چي د اسلامي نظامونو د بدنامۍ لپاره منافقين د هر غوراوي او هر انتخاب څخه کار اخلي او ډېری وختونه داسي کسان کاروي چي هغوی د هماغه ښار او وطن اوسېدونکي وي تر څو په خلکو کي شور هم جوړ سي او يو ډول خپل منځي دښمنۍ هم راپورته سي.
د دې لپاره چي د داسي مفسدينو پلانونه په نطفه کي خنثی سي او مسلمانان يې د هر ډول شر څخه نجات پيدا کړي د دوی پر ضد بايد سياستًا ډېر تند چلند او برخورد وسي او که بېله محکمې د دوی په وژلو د دوی د شر مخه نيول کيږي لا يې هم مناسب کار بولم ځکه داسي انسانان دومره سخت زړي او سپين سترګي دي چي په حبس او بندي کولو هيڅ لاري ته نه راځي؛ تجربو هم دا ښودلېده چي داسي مجرمين بېله سخت مجازاته بل په هيڅ شي د جرم او ګناه څخه لاس نه اخلي.
www.taleemulislam.net
