رالېږونکی: عبدالقدیر پوپل/ تعلیم الاسلام ویب پاڼه 2015-12-14 

د الله تعلی د رسول صلی الله عليه وسلم څخه چا پوشتنه وکړه چي څوک ښه مسلمان دی، د الله تعالی رسول صلی الله عليه وسلم ورته وفرمایل: هغه  چي د ژبي او لاس څخه یې  بل مسلمان په امان وي. (بخاری) 

په ننۍ نړۍ کي دخلکو برداشت د یو بل په واړندي لږ شوی او ډېر لږ د یوبل سره په ورین  تندي خبري کوي خصوصاً ټولنيزو پاڼو باندي لکه  فیس بک  ، ټویټر وغیره...

کیداي شي تاسو هم لیدلي وي چي ځیني ملګري قومي، ژبني، مذهبي او سیاسي  پاڼي  لري چي نه یوازي کومه خاصه فایده نلري بلکي د نفاق لامل  کیږي.  په داسي حالاتو کي تر ټولو اړینه دا ده چي د خپل دین او ژبي ساتنه وکړو، ډېره اسانه ده  چي پر فیس بک باندي د چا پر پوسټ باندي په قهر شو او څه ولیکو خو ګړی ورسته چي ارام سو  پوه به شو چي نه یوازي مو خوږ ملګری د لاسه ورکړی بلکي نا مناسبو الفاظو مو نور ملګري هم خوږ کړي.

نه یوازي چي ملګری به مو خپه کړی وي د شر بنسټ به مو هم ایښي وي، هر څوک چي ستاسو بده لیکنه ګوري او شریکه وي يې تاسو به په ګناهګاره کیږئ.

فکر وکړئ د یوې لحظې قهر  په خاطر ولي خپل آخرت خراب کړو؟

په همدې باب دالله جل جلاله رسول صلی الله عليه وسلم فرمایلي: غښتلی هغه ندی چي بل را وغورځوي  بلکي غښتلی هغه دی چي د غصې په حال کي خپل ځان کنترول کړي. (صحيح بخاری و مسلم)

الله پاک دي موږ ټول د هغو دجملې کړي چي خپل ګفتار او اعمال د سنت او قران مطابق کړوو.
امین.