ژباړه: علي الله متوکل الرحمن / تعلیم الاسلام ویب پاڼه
متعال رب جل شانه و بنده ګانو ته د ژوند غوره فرصتونه برابروي. بنده ګانو ته پکار ده، چي له دې فرصتونو څخه ګټه پورته کړي، که داسي و نه کړي، نو ناشکري به ئې کړې وي.
ځیني خلک د روژې د میاشتي پوروړي وي، لکه ناروغان؛ ځیني د شکري ناروغان وي، ښځو بیا د میاشتنۍ مریضۍ یا د اولاد د زېږون په خاطر روژې خوړلي وي. د داسي کسانو لپاره د ژمي میاشتي خورا ښه فرصت دئ.
د الله رسول صلی الله علیه وسلم فرمایي:
عن عامر بن مسعود الجمحيّ قال قال رسول اللّه صلّى اللّه عليه وسلّم: الصّوم في الشّتاء الغنيمة الباردة. (رواه الترمذی واحمد، والحدیث حسن)
عامر بن مسعود جمحی رضی الله عنه روایت کوي، چي رسول علیه السلام وفرمایل: یخ غنیمت (بې تکلیفه ثواب حاصلول) په ژمي کي روژه نیول دي.
په روژه کي دغه فرصتونه و موږ ته راکول سوي دي:
۱. ورځي ډېري لنډي وي، د سترګو په رپ کي لمر را پورته او بیرته کښته سي.
۲. روژه کونکی بغیر له زحمت څخه ثواب او اجر لاسته راوړي.
۳. د اوړي په څېر تنده نه وي.
۴. د دوبي په څېر د ورځي د اوږدوالي په خاطر لوږه نه وي.
بس، په همدې خاطر رسول اکرم صلی الله علیه وسلم د ژمي روژې د هغه غنیمت په څېر ګڼلي چي بغیر له کوم جنګ او تکلیف څخه و مجاهد ته په لاس ورځي.
د ژمي روژې خورا ډېري اسانه وي، حتی روژاتي په دې هم نه پوهیږي، چي ورځ څنګه تېره سوه او نه هم و درانه پېشلمي کولو ته ضرورت سته. یوازي د سنت طریقي په خاطر یو ګیلاس اوبه بسنه کوي.
په هر حال، د ژمي ورځي د ټولو لپاره که د تيري روژې پوروړي وي او که نه او که نارینه وي او که ښځينه د ټولو لپاره غوره فرصت دئ.
نو ددې غنیمت په لاسته راوړلو کي تلوار وکړئ!
او د الله جل شانه د بې زحمته رحمت په لور تلوار وکړی!
الله تعالی دي و ټولو ته ددې روژې نیولو توان او توفیق ورکړي.
ـــــــــــــــــــــ
ددې مقالې دري بڼه
