سیرت نبوي (۲۱۰برخه)

لیکنه: مولوي عنایت الله علمي / تعلیم الاسلام ویب پاڼه

اول: د عبدالرّحمْن بن عوف  رضی الله عنه  سَرِيه

د هجرت د شپږم کال د شعبان په مياشت کي رسول الله صلی الله علیه وسلم  عبدالرّحمْن بن عوف رضی الله عنه  د بني کلب و قبيلې ته چي په دَومَةُ الجندل کي واقع وه ولېږى، رسول الله صلی الله علیه وسلم  عبدالرّحمْن بن عوف رضی الله عنه  و خپل مخ ته کښېناوه او په خپل مبارک لاس يې لنګوټه يا عمامه ور وتړل او په جنګ کي يې په ښه معامله وصيت ورته وکړی او ورته ويې فرمايل:

که دغو خلکو ستا اطاعت وکړی نو د دوى د پاچا لور په نکاح کړه، عبدالرّحمْن بن عوف رضی الله عنه  هلته ولاړى او درې ورځي يې دوى و اسلام ته دعوتول چي په نتيجه کي ټول قوم مسلمانان سوه او عبدالرّحمْن بن عوف رضی الله عنه  د رسول الله صلی الله علیه وسلم  د امره سره مطابق د بني کلب د پاچا لور چي تَما ضُر بنت الاَصبُغ نومېدل په نکاح کړه، چي د دې پلار د بني کلب د قبيلې رئيس او پاچا ؤ، البته هغه وخت په جزيرة العرب کي ملوک الطوائفي وه، يعني: هري قبيلې پاچا درلودى.   

ان شاءالله نور بیا....

ماخذ: د سرورِ کائنات صلی الله علیه وسلم ژوند

www.taleemulislam.net