سیرت نبوي (۲۳۲برخه)

لیکنه: مولوي عنایت الله علمي / تعلیم الاسلام ویب پاڼه

د تَيماء د يهودو سره پر جزيه صلحه

تيماء چي د يهودو بله منطقه وه کوم وخت چي د هغه ځاى و يهودو ته د خيبر د فتحه کېدلو خبر ور ورسېدى او بيا يې د فدک د يهودو اخبار واورېدل او بيا د وادي القرْى د يهودو په تسليمېدلو خبر سوه يواځي دا نه چي د مسلمانانو پر ضـد يې هيڅ مقاومت و نه کړى بلکه په خپله دوى و رسول الله صلی الله علیه وسلم  ته حال ولېږى چي موږ نه جنګ غواړو نه صلحه بلکه مسلمانانو ته جزيه ورکوو، رسول الله صلی الله علیه وسلم  هم د دوى دغه غوښتنه قبوله کړه او پر جزيه يې فيصله ور سره وکړه، رسول الله صلی الله علیه وسلم  و دوى ته د أمان ليک ور و ليکى چي د دغه ليک نوشته کونکى خالد بن سعيد رضی الله عنه  ؤ او ليک داسي ليکل سوى ؤ: 

دا د محمّد رسول الله صلی الله علیه وسلم  د طرفه و بني عادياً ته ليک دى چي د دوى ساتنه د مسلمانانو پر ذمه ده او دوى به مسلمانانو ته جزيه ورکوي، پر  دوى نه تجاوز کيږي او نه د خپله ځايه څخه ايستل کيږي، شپه يې د راحت ده او ورځ يې دکارکولو ده.

ان شاءالله نور بیا....

ماخذ: د سرورِ کائنات صلی الله علیه وسلم ژوند.

www.taleemulislam.net