سوال : ايا د لمانځه په وخت كي يو څوك كولاى سي چي دكوچنيو سورتونو دويلو ترمنځ بسم الله الرحمن الرحيم ووايي او كنه ( زه چي كله په لمانځه كي د الم تركيف سورت خلاص كړم بيا بسم الله ووايم چي ورپسې د قريش سورت وايم )
د سوال کونکي نوم : يارخان
جواب : په لمانځه کي د الحمد لله وروسته چي يو يا څو سورتونه ويل کيږي د همدغو سورتونو په پيل کي د ابوحنيفة او ابويوسف رحمة الله علیهيم په آند بسم الله الرحمن الرحيم نه ويل کيږي البته د امام محمد رحمه الله عليه په آند د الحمد لله وروسته چي سورت ويل کيږي د هغه په پيل کي او همدا راز که د يوه سورت د ويلو وروسته بل سورت وايي د هغه په پيل کي هم بسم الله الرحمن الرحيم ويل کيږي .
همدا اختلاف په تحفة الفقهاء کي داسي رانقل سوئ دئ :
وهل يأتي بها عند رأس كل سورة في الصلاة ؟ على قول أبي حنيفة وأبي يوسف: لا يأتي بها. وقال محمد: يأتي بها . (تحفة الفقهاء)
ژباړه : ايا په لمانځه کي به د هر سورت په شروع کي بسم الله وايي ؟ د ابوحنيفة او ابويوسف رحمة الله علیهيم په آند نه ويل کيږي ، محمد رحمه الله عليه وايي د هر سورت په پيل کي دي بسم الله وايي .
د تعلیم الاسلام مجله ۷ ګڼه- د دارالافتاء څانکه
