لیکنه: بریالی فیضي / تعلیم الاسلام ویب پاڼه 

په دیني او ملي ارزښتونو پوه خبریال د ټولني طبیب دئ

د دین او ملت ارزښتونه باید د هر مسلمان له پاره سرې کرښي وي او د دې ارزښتونو ساتنه باید د سر او مال په بیه وکړي.

د ټولني د هر قشر او هر مسلک خلک باید د دین او ملت په ګټو پوه وي او د دې ساتنه خپله فریضه وبولي. 

مثلا یو ډاکټر که د دیني او ملي ارزښتونو درناوی ولري، ده ته به د خپلو خلکو خدمت خوند ورکوي، خپله دنده به په اخلاص سرته رسوي، نیت به يې صفا وي او د دندي په مقابل کي به د حلال رزق ترڅنګ د عبادت په څېر ثوابونه هم ترلاسه کوي.

نو همداسي نور ټول مسلکونه فرض کړئ، یعني د هر مسلک خلک که دیني او ملي ګټو ته ژمن سي، هم به يې خپله دنیا او آخرت سم سي او هم به يې د خپل مسلک له لاري ټولني ته ريښتنی خدمت کړی وي.

زه غواړم خصوصا د هغه خبریال چي دیني او ملي ارزښتونو ته ژمن وي، د مسئولیت او ټولني ته يې د افادیت په اړه یوڅه ولیکم. 

خبریالي یو ډېر سپېڅلی مسلک دئ، دنده يې دا ده، چي د ټولني خلک د همدغه ټولني په وضعیت خبر کړي او خلکو ته د ذهنیت جوړوني په هدف عامه پوهاوی وړاندي کړي. 

خبریالي یو ټولنیز مسلک دئ، د خبریال سروکار مستقیما د ټولني سره دئ او د کار اغېز يې د ټولني خلک متاثره کوي، ځکه نو خبریال د ټولني په وړاندي ډېر دروند مسئولیت لري او د ټولني په پرمختګ او بحران کي غوښن رول لري. 

که خبریالان د دیني او ملي فکر څښتنان وي، دوی د خپل مسلک له لاري کولای سي، په ټولنه کي داسي فعالیت وکړي، چي ټولنه د پرمختګ لوري ته رهبري کړي، د آینده ممکنه بحرانونو مخه ونیسي او د ټولني موجوده ستونزو ته د حل لاري پیدا او پېشنهاد کړي. 

اما که چیري خبریالان د پیسو زامن وي، فکري غلامان وي او د بهرنیو مفکورو څخه متاثره وي، بیا نو دا خلک د دې ټولني له پاره ډېر مضر تمامېدای سي. 

په کار دا ده، چي خبریال په ټولنه کي خپل ارزښت وپېژني، دیني او ملي ګټي وپېژني او هیڅکله پرېنږدي، چي د نورو افغان دښمن کړیو له خوا څخه د دین او ملت د ګټو خلاف استعمال سي. 

نېټه: ۹/ رمضان المبارک/۱۴۴۵

www.taleemulislam.net