محمد یعقوب قاسمي / تعلیم الاسلام ویب پاڼه

   حضرت انس بن نضر رضی الله عنه  يوله هغو صحابه وو څخه وو چي د بدر په غزا کي يې ګډون نه وو کړى له همدې امله به يې پر ځان ملامتيا ويل او ډېربه غمجن وو، په دې هيله وو که د اسلام بله غزا پېښه سوه حتماً به ګډون پکښي کوي، د تقدير پرېکړه وه چي د احد غزا پېښه سوه حضرت انس بن نضر رضی الله عنه په ډېره مينه او زړورتوب په دې غزا کي ګډون وکړئ.

 د غزا په لومړي سر کي مسلمانانو فتحه تر لاسه کړه خو د يوې تېروتني له امله مسلمانان د مؤقت وخت لپاره شاتګ ته اړسول، تېروتنه دا وه چي رسول الله صلی الله علیه وسلم د عبدالله بن جبير رضی الله عنه په مشرۍ پنځوسو تنو غشو ويشتونکو صحابه کرامو رضی الله عنهم ته دنده ورکړې وه چي پرغونډۍ به کښيني او د مسلمانانو دفاع به کوي، که مسلمانان فتحه ترلاسه کړي او که ماته وخوري بايد دوى د خپل ځای څخه ونه ښوري، خو له بده مرغه دوى هغه وخت ولاړ سول چي په لومړيو کي مسلمانان بريالي سول ، کله چي دوى ولاړېدل په دوى کي چي څوک آمير وو هغه منع کړه چي مه ځئ ! خو دوى دا ويل چي کافرانو ماته وخوړله د تيښتي په حالت کي دي، بايد ورپسي ورسو او د غنيمت د مالونو په ټولولو کي د مسلمانانو سره مرسته وکړو، او دا فکر يې کاوه چي رسول الله صلی الله علیه وسلم موږ يوازي د برياليتوب تر وخته پوري له ولاړيدلو څخه منع کړي يو. 

کله چي مسلمانان له دې ځاى څخه ولاړ سول د جګړې ډګر ته ورسېدل، کافرانو چي دغه ځاى خالي وليدئ نو له وخته څخه يې ګټه واخيسته اوله هغه لوري يې پر مسلمانانو حمله وکړه، مسلمانان د نا خبرۍ په حالت کي وو چي د سختو  بريدونو سره مخ  سول، د دوو طرفونو څخه د کافرانو په منځ  کي راغلل په پايله کي د ماتي سر ه مخ سول، حضرت انس بن نضر رضی الله عنه وليد‌ل چي سعد بن معاذ رضی الله عنه را روان دئ ، ده مبارک ورته وويل: اې  سعده ! چيري ځې ؟ په الله جل جلاله مي دي قسم وي چي د احد د غره څخه د جنت بوى راځي! ددې خبري تر کولو وروسته يې توره پورته کړه او په مېړانه د کافرانو په يوه ډله ورننوتى سخته جګړه يې وکړه تر هغه وخته پوري راو نه وتى تر څو شهيد سو. د شهادت څخه وروسته چي وکتل سو ټوله بدن يې د غلبيل په شان سورى سوری وو تر اتياوو زيات د تورو او غشو زخمونه يې پر بدن وه آن تر دې چي نه پېژندل کېدئ آخر د ګوتو پر بندو وپېژندل سو .

فايده: څوک چي په رښتيني او مخلصانه ډول د الله جل جلاله د رضا د حاصلولو په موخه زخمي سي يقينا ً به په دنيا کي  د جنت بوى ورته راځي حضرت انس بن نضر رضی الله عنه چي په اخلاص سره د الله تعالی جل جلاله د رضا غوښتونکى وو په دنيا کي يې د جنت بوى حساوه، نو که په چا کي  کامل اخلاص موجود سي په دنيا کي به د جنت خوندونه محسوسوي .

ماخذ: تعلیم الاسلام مجله: ۱۲ ګڼه