ليکنه: قاري عبد المجيد"رشيدي" / تعلیم الاسلام ویب پاڼه

قرآن کريم د الله جل جلاله عظيم کلام دی. پر هر مسلمان نارينه او مسلمانه ښځه لازمه ده، چي په صحيح توګه يې تلاوت کړي؛ ځکه د قرآن کريم غلط تلفظ کول، لکه د يوه حرف پر ځای بل حرف ويل، يعني صاد په سين، ذال په زا، قاف په کاف، عين په همزه بدلول، يا په پښتو حرف اړول، د حرف کمول او زياتول، حرکتونه (زور، زېر، پېښ) يو د بل پر ځای ويل، ساکن حرف په مشدد او مشدد په ساکن ويل، يا دې ته ورته نوري تېروتني د قرآن کريم اصلي معنی ته زيان رسوي او په ډېرو ځايونو کي تلاوت کوونکی پرې ګناهګار کېږي.

د تجويد په اصطلاح کي غلطۍ ته لحن وايي، چي په دې ډېر عوام وروڼه او ځيني ملايان هم مبتلا دي. 

لحن: په لغت کي غلطۍ ته وايي او په اصطلاح کي د تجويد خلاف قرآن ويلو ته لحن ويل کېږي.

لحن دوه ډوله لري:

الف- جلي لحن
ب- خفي لحن 

الف- جلي لحن (ښکاره غلطي) : هغه لحن ته وايي، چي د حرف او کلمې په ذات يا صفت کي بدلون راولي.

دا لحن عموماً څلور ډولونه لري:

١- تبديل الحرف بالحرف (د يوه حرف پر ځاى بل حرف ويل)؛ لکه: د قُلْ پر ځاى کُلْ  ويل.

٢- تبديل الحرکات بالحرکات (حرکتونه يو د بل پر ځاى ويل)؛ لکه: د اَنعَمْتَ پر ځاى اَنعَمْتُ ويل. يا حرکت او سکون يو په بل سره بدلول.

٣- زيادةُ الحرف (د حرف زياتول)؛ لکه: د اَلْحَمْدُ پر ځاى اَلْحَمْدُوْ ويل؛ يا ساکن حرف مشدد ويل.

٤- نقصان الحرف (د حرف کمول)؛ لکه: د لَمْ يُوْلَدْ پر ځاى لَمْ يُلَدْ ويل؛ يا هم مشدد حرف ساکن ويل.

د جلي لحن دنيوي حکم حراموالی او اخروي حکم يې عذاب دی.

ماخذ: تعلیم الاسلام مجله: ۱۳ ګڼه