لیکنه: مولوي نورالحق مظهري/ تعلیم الاسلام ویب پاڼه

د امير د فرمان څخه د مخالفت ځيني تاوانونه 

۱ – د شرعي امير د فرمان څخه مخالفت شرعا حرام دئ، ځکه نو څوک چي يې کوي الله تعالی او رسول الله صلی الله عليه وسلم د ځان څخه خوابدي کوي.

۲ – د امير د فرمان په منلو کي د ظاهري تسليم تر څنګ ډېر معنويات هم پراته دي، ځکه نو کوم کسان چي د امير اطاعت کوي کړه وړه به يې د مثبتو معنوياتو څخه ډک وي، خو کوم کسان چي د امير د فرمان مخالفت کوي کړه وړه به يې د معنوياتو څخه خالي وي ځکه نو په کار کي به يې اخلاص نه وي، کار به يې د برکت څخه خالي وي او د پرمختګ پر ځای به ورځ تر بلي د انحاط لوري ته روان وي.

۳ – کوم کسان چي د خپل امير اطاعت نه کوي دا په تجربه ثابته سوې ده چي د دوی تر لاس لاندي خلک بيا د دوی اطاعت نه کوي.

۴ – کوم کسان چي د امير د فرمان څخه مخالفت کوي ارومرو به په خپل سريو اخته کيږي او داسي کارونه به ورڅخه کيږي چي ممکن آبرو يې پکښې ولاړه سي.

۵ – د امير د فرمان څخه مخالفت د شبهاتو او تهمتونو د پيدا کيدلو سبب جوړيږي او خلکو ته د خبرو کولو زمينه برابروي.

۶ – د امير د فرمان څخه مخالفت نورو مخالفتونو او سرغړونو ته لاره آواره وي او په ځينو مواردو کي ممکن خبره تر بغاوت پوري ورسوي.

۷ – د امير د فرمان څخه مخالفت انسان ته پر ناوړه کارونو او ضياع الحقوق جرأت ورکوي او د منفي تساهل مريضي ورته پيدا کوي.

۸ – د امير د فرمان څخه مخالفت بې اعتمادي او بې باوري پيدا کوي او د خدمت روحيه وژني.

۹ – د امير د فرمان څخه مخالفت د امير او مأمور تر منځ منفي تقابل پيدا کوي چي امير عکس العمل ته مجبوروي.

۱۰ – د امير د فرمان څخه مخالفت د تداوم په صورت کي د ډېرو ټکريو او ناخوالو سبب جوړيږي.

www.taleemulislam.net